Wendy Williams merr lajme premtuese për gjendjen e saj mendore

Wendy Williams ka marrë një vlerësim pozitiv nga një test psikiatrik, një zhvillim që mund të ndihmojë në përpjekjet e saj për t’i dhënë fund kujdestarisë ligjore.

Ish-prezantuesja e emisioneve televizive, 60 vjeçe, iu nënshtrua një testi të kapacitetit mendor gjatë një vizite në spitalin Lenox Hill të New York-ut dhe, sipas burimeve, shënoi një rezultat perfekt.

Testi 10-pikësh vlerësonte aftësitë e saj ndërgjegjësuese dhe vendimmarrëse, duke sugjeruar se ajo mund të jetë më e vetëdijshme sesa është paraqitur nga kujdestari i saj, shkruan DailyMail.

Megjithëse ky vlerësim nuk sfidon zyrtarisht diagnozën e saj të demencës frontotemporale dhe afazisë, rezultatet e tij pritet të paraqiten në gjykatë.

Williams ka bërë përpjekje publike për të treguar se është në gjendje të menaxhojë jetën dhe financat e saj, ndërsa autoritetet në New York po hetojnë kushtet e kujdestarisë së saj dhe qëndrimin në një qendër kujdesi me liri të kufizuar.

Në vazhdën e këtyre zhvillimeve, Wendy do të bëjë një paraqitje televizive në “The View” më 14 mars, intervista e saj e parë që nga diagnoza e saj.

Ende nuk dihet nëse ajo do të dalë drejtpërdrejt në ekran apo përmes një lidhjeje telefonike. /Telegrafi/