Qytetarët të ankohen për faturat e larta të energjisë elektrike në EVN ose KRRE

Të drejtë ankese do të kenë qytetarët që mendojnë se fatura e energjisë elektrike është e gabuar. Kjo është e drejta e tyre ligjore dhe qytetarët do të mund të paraqesin ankesën e tyre tek furnizuesi universal “EVN Home” brenda 8 ditëve. Gjithashtu, aplikacioni duhet të përmbajë numrin e llogarisë, përshkrimin e problemit dhe një kopje të faturës dhe të dorëzohet në adresën info@evn.mk.

Nëse qytetari nuk është i kënaqur me përgjigjen, ai ose ajo ka të drejtë të ankohet në Komisionin Rregullator për Energjetikë (KRRE).

“Nëse EVN nuk përgjigjet brenda afatit ligjor ose qytetarët nuk janë të kënaqur me përgjigjen, mund të kontaktojnë KRRE-në përmes e-mail: erc@erc.org.mk ose potrosuvaci@erc.org.mk, duke bashkangjitur dokumentet nga procedura me EVN. KRRE do të bëjë një hetim të pavarur dhe do të nxjerrë një vendim të detyrueshëm”, thonë nga Ministria e Energjisë, Minierave dhe Burimeve Minerale.

Nëse KRRE merr një vendim në favor të qytetarit, EVN-ja do të jetë e obliguar ligjërisht të korrigjojë faturën, më së shpeshti duke llogaritur një ulje në faturat e mëvonshme./Telegrafi/