Margaret Qualley mahnit në ‘Oscars 2025’ me një performancë spektakolare në nder të James Bond

Margaret Qualley befasoi të gjithë të pranishmit në ceremoninë e Oscars 2025, duke u shfaqur në një performancë të veçantë gjatë pjesës të nderimit të James Bond.

Aktorja 30-vjeçare, e njohur për rolin e saj në filmin “Substance”, mahniti publikun kur u bashkua me një grup kërcimtarësh për një kërcim sensual, të shoqëruar me kolonën zanore ikonike të James Bond.

Kjo performancë energjike ka nxitur spekulime se Qualley mund të jetë vajza e re e Bond-it në filmin e ardhshëm të ekskluzivitetit, i cili pritet të sjellë një epokë të re për agjentin 007.

Më herët gjatë mbrëmjes, Qualley parakaloi në tapetin e kuq të mbushur me yje, e veshur me një fustan të zi kadifeje me shpinë të hapur dhe një varëse diamanti që binte në sy.

Në shoqërinë e bashkëshortit të saj, producentit të njohur Jack Antonoff, ajo tërhoqi vëmendjen e medieve dhe fansave me elegancën dhe stilin e saj.

Në mes të ceremonisë, aktorja dhe ish-vajza e Bond-it, Halle Berry, u ngjit në skenë për të prezantuar një pjesë speciale dedikuar Barbara Broccoli dhe Michael G. Wilson, producentëve të filmave të James Bond.

Në këtë moment, Margaret Qualley, doli në skenë me një fustan të kuq saten me një dekolte të thellë dhe një të çarë të guximshme deri në kofshë, duke dhuruar një performancë që elektrizoi publikun. Kërcimi i saj dinamik, i realizuar me një koreografi të sofistikuar dhe të shoqëruar nga një grup balerinësh elegantë, u bë një nga momentet më të komentuara të mbrëmjes.

Në një moment, kërcimtarët e ngritën atë lart në ajër, ndërsa ajo shtriu krahët, duke përshëndetur këngëtarët që performonin disa nga këngët më të famshme të James Bond.

Pas performancës së Qualley, Lisa nga BLACKPINK interpretoi “Live and Let Die”, duke sjellë një energji shpërthyese në skenë. Pas saj, Doja Cat performoi “Diamonds Are Forever”, një interpretim që u prit me reagime të përziera nga fansat në rrjetet sociale. Ndërkohë, Raye tregoi talentin e saj vokal me një interpretim magjepsës të “Skyfall”, këngës fituese të Oscar-it nga Adele.

Dalja e fuqishme e Margaret Qualley në skenën e Oscar-it, e kombinuar me spekulimet e vazhdueshme për kastin e ri të James Bond, ka bërë që shumë të besojnë se ajo mund të jetë një nga figurat kyçe në filmin e ardhshëm të ekskluzivitetit legjendar.

Megjithëse nuk ka ende një konfirmim zyrtar, fansat tashmë kanë filluar të imagjinojnë aktoren në rolin e një ‘femme fatale’ të denjë për agjentin sekret më të famshëm në histori. /Telegrafi/