Arrestohet kandidati pro-rus për president të Rumanisë

Kandidati pro-rus i zgjedhjeve presidenciale të Rumanisë, Călin Georgescu, është marrë nga policia për t’u marrë në pyetje, në lidhje me votimin e diskutueshëm të anuluar të nëntorit të kaluar që ai fitoi.

“Călin Georgescu do të paraqiste kandidaturën e tij të re për president. Rreth 30 minuta më parë policia e ndaloi në trafik dhe u tërhoq për t’u marrë në pyetje në Prokurorinë e Përgjithshme! Ku është demokracia, ku janë partnerët që duhet të mbrojnë demokracinë”, thuhet në një postim në llogarinë e Georgescu në Facebook.

Sipas kanalit rumun të lajmeve Digi24, prokurorët kanë lëshuar një urdhërarrest për të dhe kanë filluar të kontrollojnë ambientet e bashkëpunëtorëve të tij të ngushtë, duke përfshirë liderin mercenar Horațiu Potra dhe truprojën e Georgescu.

Kanali rumun i lajmeve Antena 3 CNN, raportoi se Georgescu po merret në pyetje në lidhje me financimin e fushatës së tij zgjedhore vitin e kaluar, transmeton Telegrafi.

Prokurorët dyshojnë për 27 persona për veprim kundër rendit kushtetues të Rumanisë, nxitje publike, inicim të një organizate fashiste dhe deklarata të rreme në lidhje me burimet e financimit të një fushate zgjedhore, por ata nuk përmendën emrin Georgescu apo ndihmësit e tij në deklaratën e tyre.

Megjithatë, pak pasi lajmet për bastisjet u publikuan të mërkurën në mëngjes, Georgesku pohoi se kërkimet kishin për qëllim bllokimin e kandidaturës së tij të re presidenciale.

Rumania u zhyt në kaos politik në fund të vitit të kaluar kur Georgescu, një pro-rus, i së djathtës ekstreme dhe skeptik i NATO-s, fitoi raundin e parë të votimit presidencial dhe ishte planifikuar të përballej me reformisten Elena Lasconi në raundin e dytë.

Megjithatë, Gjykata Kushtetuese anuloi raundin e parë të zgjedhjeve presidenciale pas një operacioni të dyshuar rus për të ndikuar në rezultat.

Zgjedhjet e reja janë planifikuar të mbahen më 4 maj, ndërsa balotazhi është planifikuar dy javë më vonë, më 18 maj. /Telegrafi/

‼️ Romanian presidential candidate Calin Georgescu detained

Calin Georgescu, a pro-Russian candidate in the presidential election, the results of which were canceled due to alleged Russian interference, has been detained in Romania.

The politician’s car was stopped on the road… pic.twitter.com/jVy8n1i0ke

— NEXTA (@nexta_tv) February 26, 2025