Raporti 24-orësh i policisë: Arrestime dhe incidente në rajonin e Prishtinës

Policia e Kosovës ka publikuar raportin 24-orësh për incidentet e ndodhura në rajonin e Prishtinës, duke përfshirë raste të posedimit të narkotikëve, armëmbajtjes pa leje, dhunës në familje dhe persona të zhdukur.

Posedim i narkotikëve

Rr. Gjorgj Bush, Prishtinë | 22.02.2025, 18:15. Një mashkull kosovar është arrestuar pasi gjatë kontrollit te ai është gjetur dhe sekuestruar 3.9 gramë substancë e dyshuar narkotike e llojit marihuanë. Pas intervistimit, me vendim të prokurorit, i dyshuari është liruar në procedurë të rregullt.

Prishtinë | 22.02.2025, 20:50. Një mashkull kosovar ka raportuar se, gjatë mungesës së tij në shtëpi, e dashura e tij (shtetase kosovare) i ka vjedhur një armë nga sirtari. Rasti është duke u hetuar nga policia.

Armëmbajtje pa leje

Rr. Papa Kristo Negovani, Prishtinë | 22.02.2025, 19:48. Një mashkull kosovar është arrestuar pasi kishte shtënë me armë zjarri gjatë një ahengu familjar. Në vendin e ngjarjes, ai ka dorëzuar një armë të tipit AK-47, një karikator dhe 15 fishekë. Pas intervistimit, prokurori ka vendosur që i dyshuari të lirohet në procedurë të rregullt.

Rastet e dhunës në familje

Prishtinë | 21.02.2025, 23:30. Një grua kosovare ka raportuar se pas një mosmarrëveshjeje verbale, bashkëshorti i saj e ka kapur për duar, duke bërë që të dy të rrëzohen. Viktima ka marrë tretman mjekësor, ndërsa i dyshuari është liruar në procedurë të rregullt.

Lipjan | 22.02.2025, 10:00
Tre persona janë shoqëruar në polici për intervistim pas një mosmarrëveshjeje. Dy gra të përfshira në incident kanë pranuar tretman mjekësor. Pas konsultimit me prokurorin, të gjithë janë liruar në procedurë të rregullt.

Podujevë | 22.02.2025, 15:00
Një mashkull kosovar është arrestuar pasi ka sulmuar fizikisht të dashurën e tij dhe e ka kërcënuar se do të publikojë fotografitë e saj nëse denoncon rastin në polici. Viktima ka marrë trajtim mjekësor dhe është kthyer tek prindërit e saj. Pas intervistimit, i dyshuari është liruar në procedurë të rregullt.

Prishtinë | 22.02.2025, 14:21
Një shtetas i huaj ka raportuar se pas një mosmarrëveshjeje është sulmuar dhe kanosur nga djali i tij. Viktima ka marrë tretman mjekësor dhe më pas është liruar, ndërsa i dyshuari është arrestuar dhe dërguar në mbajtje me vendim të prokurorit.

Prishtinë | 21.02.2025, 21:30
Një mashkull kosovar, nën ndikimin e substancave narkotike, ka sulmuar fizikisht dhe kërcënuar një grua kosovare. Viktima nuk ka pranuar tretman mjekësor, ndërsa i dyshuari është arrestuar dhe dërguar në mbajtje.

Person i zhdukur

Rr. Bedri Pejani, Fushë Kosovë | 22.02.2025, 21:30 Një mashkull kosovar ka raportuar se vajza e tij e mitur është larguar nga shtëpia dhe nuk dihet vendndodhja e saj. Rasti është nën hetime nga njësitet kompetente.

Policia e Kosovës vazhdon hetimet për të gjitha rastet dhe u bën thirrje qytetarëve të raportojnë çdo incident apo informatë që mund të ndihmojë në zgjidhjen e rasteve, njofton Telegrafi.