Sulmohet fizikisht prokurori në Pejë, Ramiz Buzhala – i dyshuari ndalohet për 48 orë

Këshilli Prokurorial i Kosovës (KPK) dhe Zyra e Kryeprokurorit të Shtetit (ZKPSH) kanë reaguar ashpër ndaj sulmit fizik të ndodhur sot ndaj prokurorit të Departamentit të Përgjithshëm në Prokurorinë Themelore në Pejë, Ramiz Buzhala.

Ky sulm, i cili lidhet ngushtë me detyrat dhe përgjegjësitë e tij profesionale, është dënuar me forcë nga të dy institucionet.

Në një reagim për media, KPK dhe ZKPSH theksuan se “aktet e tilla ndaj prokurorëve janë të patolerueshme dhe e dëmtojnë rëndë funksionimin e sistemit të drejtësisë.”

Ata e shprehën mbështetjen e plotë për prokurorin Buzhala, duke e inkurajuar atë të vazhdojë misionin e tij ligjor pa u ndikuar nga këto sulme.

“Këshilli Prokurorial i Kosovës dhe Zyra e Kryeprokurorit të Shtetit qëndrojnë fuqishëm pranë prokurorit Buzhala dhe e mbështesin atë në punën e tij të përditshme, duke e inkurajuar për përmbushjen e misionit të tij ligjor,” thuhet në deklaratën e përbashkët.

Po ashtu, KPK dhe ZKPSH theksuan se aktet e dhunshme nuk do të kenë ndikim në punën e prokurorit Buzhala dhe se ai do të vazhdojë të ndjekë veprat penale pa u penguar. “Sulmi ndaj prokurorit Buzhala nuk mund të ndikojë që ai të zmbrapset nga detyra e tij për të ndjekur kryesit e veprave penale,” shtuan ata.

Në lidhje me hetimet, të dy institucionet njoftuan se sulmi ndaj prokurorit është duke u trajtuar me prioritet nga organet kompetente të rendit dhe drejtësisë.

“Sipas informacioneve të fundit, ndaj sulmuesit është marrë vendim për ndalimin e tij për 48 orë dhe janë duke u ndërmarrë hapat e mëtutjeshëm ligjorë,” njoftuan KPK dhe ZKPSH./Telegrafi/