Trump gati të vendosë tarifa për veturat e importuara – sa mund të rritet çmimi i tyre?

Presidenti i SHBA-së Donald Trump njoftoi dje se ai synon të vendosë një tarifë prej rreth 25% për importet e veturave.

Taksa mund t’i shtojë mijëra dollarë çmimit të automjeteve të reja kur konsumatorët po kërkojnë opsione më të përballueshme.

Javën e kaluar, Trump tha se ai mund të miratonte tarifat më 2 prill.

Bëhet e ditur se presidenti amerikan i ka bërë tarifat një pjesë qendrore të planit ekonomik të administratës së tij, përcjell Telegrafi.

Që nga inaugurimi i tij, ai ka vendosur (dhe më pas ka ndaluar) një tarifë 25% ndaj Meksikës dhe Kanadasë, ka vendosur një taksë 10% për të gjitha importet kineze dhe ka shpallur një taksë 25% për të gjithë çelikun dhe aluminin e importuar.

Ndërsa së fundmi udhëzoi Sekretarin e tij të Tregtisë dhe Përfaqësuesin e Tregtisë së SHBA-së që të hetojnë se si SHBA mund të vendosë tarifa reciproke kundër vendeve të tjera.

Sipas një raporti të fundit të S&P Global Mobility që analizoi tarifat e Trumpit kundër Meksikës dhe Kanadasë, gati gjysma e të gjitha veturave të reja të shitura në Shtetet e Bashkuara janë të importuara.

Ai zbuloi se çmimi i një veture prej 25,000 dollarësh të importuar nga secili vend do të rritej me 6,250 dollarë.

Tarifa gjithashtu mund të rrisë çmimin e komponentëve të veçantë.

Gjithashtu, ajo do të prekë të gjitha importet e automjeteve në vend, duke përfshirë ato nga Koreja e Jugut, Japonia dhe Bashkimi Evropian.

Ndryshe, kërcënimet po i detyrojnë prodhuesit e automjeteve të përshtaten.

Një raport në fund të muajit të kaluar pretendonte se Porsche dhe Audi tashmë po konsideronin zgjerimin e prodhimit në SHBA. /Telegrafi/