Si teoria e relativitetit e Ajnshtajnit mund te sjell revolucion në punë?

Në fillim të shekullit XX-të, Teoria e Relativitetit e Ajnshtajnit (E=mc²) ndryshoi tërësisht mënyrën tonë të të kuptuarit të universit dhe botës siç e njihnim. Teoria e Barazisë ™, E = FQ², ka fuqinë të bëjë diçka të ngjashme për biznesin.

Ekuacioni është i thjeshtë, por transformues, shkruan forbes.

Barazia (E) arrihet kur shumëzojmë drejtësinë e mundësive (F) me cilësinë e përfaqësimit (Q) dhe më pas i ngrisim në katror ndikimin e tyre të kombinuar.

Për ta realizuar këtë ekuacion, vendet e punës duhet të sigurojnë që të gjithë, pavarësisht gjinisë, racës apo prejardhjes, të kenë qasje të barabartë në mundësi dhe të jenë të përfaqësuar në mënyrë të drejtë në çdo nivel.

Në shkencë, Albert Ajnshtajni dëshmoi se energjia dhe masa janë të lidhura, transmeton Telegrafi.

Në biznes, Teoria e Barazisë tregon se drejtësia dhe përfaqësimi i barabartë janë faktorë të pandashëm që, kur janë në harmoni, fuqizojnë progresin në mënyrë eksponenciale.

Ekuacioni i punës jashtë ekuilibrit
Për një kohë të gjatë, ekuacioni i punës ka qenë jashtë ekuilibrit.

Barrierat sistemike kanë kufizuar qasjen e grave dhe grupeve të nënpërfaqësuara në pozicione lidershipi, paga të drejta dhe fuqi vendimmarrëse.

Për shembull, gratë mbajnë më pak se 12 për qind të pozicioneve të drejtorëve ekzekutivë në kompanitë e Fortune 500. Më pak se 1 për qind e fondeve të korporatave për prokurime shkon për bizneset në pronësi të grave.

Këto pabarazi nuk janë vetëm një dështim moral – ato janë mundësi të humbura të mëdha për rritje, inovacion dhe përparim.

Diversitet më i madh, fitim më i lartë

Përfaqësimi është një faktor shumëzues. Ai jo vetëm që shton vlerë, por e rrit atë.

Kur zërat e ndryshëm janë të pranishëm dhe të përfaqësuar në mënyrë të barabartë në lidership dhe në rolet vendimmarrëse, ata krijojnë efekte të shumta në të gjithë organizatën.

Ky ndikim eksponencial është arsyeja pse përfaqësimi në ekuacion është ngritur në katror.

Hulumtimi i McKinsey & Company tregon se kompanitë me diversitet më të madh në lidership kanë 25 për qind më shumë gjasa të arrijnë fitime mbi mesataren.

Në mënyrë të ngjashme, një studim nga Boston Consulting Group tregon se kompanitë gjithëpërfshirëse kanë 1.7 herë më shumë gjasa të jenë liderë në inovacion.

Perspektivat e ndryshme jo vetëm që përmirësojnë vendimmarrjen, por gjithashtu ndihmojnë organizatat të kuptojnë ndryshimet e tregut, të plotësojnë nevojat e klientëve dhe të krijojnë zgjidhje revolucionare.

Produktivitet më i lartë

Përfitimet për bizneset shkojnë përtej inovacionit. Kompanitë që i japin prioritet barazisë arrijnë të mbajnë punonjësit dhe kanë një produktivitet më të lartë.

Vendet e punës gjithëpërfshirëse kanë 50 për qind më pak shkallë të largimit të punonjësve, sipas një studimi të Deloitte. Kjo u kursen kompanive miliona në kostot e rekrutimit dhe trajnimit, duke krijuar një forcë punëtore më të angazhuar.

Barazia gjithashtu nxit besnikërinë e konsumatorëve. Konsumatorët modernë gjithnjë e më shumë e lidhin mënyrën se si shpenzojnë paratë e tyre me vlerat e tyre. Bizneset që i japin përparësi drejtësisë dhe përfaqësimit janë më të mirëpozicionuara për të fituar pjesë të tregut dhe për të ndërtuar besim afatgjatë.

Barazia është urgjente

Urgjenca për barazi nuk ka qenë kurrë më e madhe.

Forumi Ekonomik Botëror vlerëson se do të duhen 134 vjet për të mbyllur hendekun gjinor. Ky afat kohor është i papranueshëm.

Megjithatë, një studim i ri global i kryer nga Morning Consult në bashkëpunim me The Female Quotient ka zbuluar se shumica e punonjësve në botë (58 për qind) besojnë se liderët e biznesit mund ta zgjidhin çështjen e barazisë gjinore në vendet e punës brenda më pak se një dekade.

Është e mahnitshme që barazia është i vetmi objektiv global që liderët e biznesit mund ta zgjidhin brenda fushës së tyre të ndikimit.

Për sfida të tjera, si ndryshimet klimatike dhe varfëria, nevojiten qasje të gjera dhe sistematike. Por barazia është në duart e çdo lideri që angazhohet për ndryshim.

Morning Consult gjithashtu zbuloi se 32 për qind e fuqisë punëtore globale beson se është përgjegjësi e liderëve të biznesit të zgjidhin çështjen e barazisë gjinore.

Nga ana tjetër, ata besojnë se qeveria duhet të adresojë ndryshimet klimatike (43 për qind) dhe varfërinë (64 43 për qind). Vetëm 5-6 43 për qind mendojnë se liderët e biznesit mund të zgjidhin këto probleme.

Ashtu si Teoria e Relativitetit e Ajnshtajnit hapi rrugën për arritje revolucionare në shkencë dhe teknologji, Teoria e Barazisë, E = FQ², ka potencialin të riformulojë rregullat e biznesit.

Drejtësia në mundësi siguron qasje të barabartë në burime, mentorim dhe rrugë drejt lidershipit. Ndërsa cilësia e përfaqësimit fuqizon këtë drejtësi, duke siguruar që zërat e ndryshëm të jenë të pranishëm dhe të vlerësuar.

Së bashku, ato krijojnë ndryshime eksponenciale dhe të qëndrueshme. /Telegrafi/