Po zhvillonin gara të shpejtësisë në Gjilan, dy shoferë gjobiten me nga 400 euro

Policia e Kosovës vazhdon me masa të rrepta për parandalimin e aksidenteve dhe kundërvajtjeve në trafikun rrugor.

Njësitet Patrulluese dhe Njësiti Rajonal i Komunikacionit Rrugor nga Drejtoria Rajonale e Policisë në Gjilan, gjatë fundjavës, kanë shqiptuar dy gjoba në vlerë prej 400 eurosh secila, duke shoqëruar edhe me katër pikë negative dhe masën e përkohshme të ndalimit të drejtimit të automjeteve për një periudhë prej 10 muajsh.

Gjoba u vendosën ndaj dy kundërvajtësve të cilët u kapën duke zhvilluar gara shpejtësie me automjete.

Përveç këtyre rasteve, gjatë fundjavës janë shqiptuar edhe 12 gjoba të tjera kundërvajtëse, të shoqëruara me masa të përkohshme të ndalimit të drejtimit të mjeteve motorike.

Këto masa janë marrë ndaj drejtuesve të automjeteve të cilët janë kapur duke:

Drejtuar automjetin nën ndikimin e alkoolit,
Kryer tejkalime të rrezikshme në vijë të plotë,
Tejkalur shpejtësinë e kufizuar të lëvizjes,
Shkelur rregulla të tjera të përcaktuara nga ligji për trafikun rrugor.

Policia apelon te të gjithë drejtuesit e automjeteve që të respektojnë dispozitat ligjore në trafik, duke theksuar rëndësinë e:

Uljes së shpejtësisë,
Mos përdorimit të telefonit gjatë vozitjes,
Vendosjes së rripit të sigurimit,
Kujdesit ndaj këmbësorëve,
Respektimit të sinjalistikës rrugore dhe semaforëve.

Masat e shtuara synojnë parandalimin e aksidenteve dhe krijimin e një ambienti më të sigurt për të gjithë pjesëmarrësit në trafik./Telegrafi/