“Kanada nuk është në shitje”, kryeministri i Ontarios i dërgon mesazh Trumpit përmes kapelës

Ishte e vështirë të mos dallohej mesazhi i kryeministrit të provincës kanadeze, Ontarios, Doug Ford, drejtuar amerikanëve.

Ai e mbante mesazhin pikërisht në kapelën e tij.

Përpara një takimi të kryeministrave provincialë me kryeministrin e Kanadasë Justin Trudeau për të diskutuar përgjigjen e vendit ndaj kërcënimit të tarifave të SHBA-së, Ford kishte veshur një kapele me shkronja të bardha ku shkruhej “Kanada nuk është në shitje”.

Bëhet e ditur se ky veprim vjen pasi presidenti i sapozgjedhur amerikan, Donald Trump, ka kërcënuar se do të vendosë një tarifë për të gjitha mallrat kanadeze dhe ka menduar për përdorimin e “forcës ekonomike” për të “hequr qafe” kufirin midis dy vendeve.

Këto kërcënime çuan në takimin e së mërkurës në Otavë, shkruan yahoonews, përcjell Telegrafi.

“Kjo ka të bëjë me kanadezët e përditshëm që mbrojnë vendin”, tha Ford kur u pyet për kapelën e tij.

Ai tregoi se kapelën e mori nga Jackpine Dynamic Branding në Otava dhe më vonë e falënderoi kompaninë në X.

Liam Mooney i Jackpine tha se ideja për kapelen i erdhi javën e kaluar kur po shikonte Ford duke u intervistuar në Fox News dhe e dëgjoi prezantuesin të thoshte se do të ishte një “privilegj” për Kanadanë t’i bashkohej SHBA-së.

“Ne menduam, jo. Është një privilegj të jesh kanadez”, tha Mooney.

Ndryshe, Mooney e përshkroi aktin si një “akt të vogël patriotizmi” dhe jo një skemë për të fituar para.

“Nuk ka rëndësi se cila është përkatësia juaj politike, cila është përkatësia juaj partiake ose cili mund të jetë botëkuptimi juaj. Unë mendoj se ne të gjithë mund të pajtohemi se Kanada është një vend i mrekullueshëm dhe në një botë kombesh qëndron e vetme si një vend shumë unik dhe një vend i mrekullueshëm”, tha ai. /Telegrafi/