Përparim Rama: Reçaku është plaga dhe dhimbja jonë!

Kryetari i Prishtinës, Përparim Rama ka kujtuar masakrën e Reçakut, ku ka thënë se mbetet në kujtesën tonë kombëtare, si një nga ditët më të dhimbshme të historisë sonë.

Ai ka pohuar se Reçaku është plaga dhe dhimbja jonë, transmeton Telegrafi.

“15 janari i 1999-tës, mbetet në kujtesën tonë kombëtare, si një nga ditët më të dhimbshme të historisë sonë. Në atë mëngjes të acartë, 45 shqiptarë të pafajshëm u vranë barbarisht në fshatin Reçak, duke lënë pas skena që tronditën jo vetëm Kosovën, por mbarë botën. Ishte një akt çnjerëzor që synonte të shuante rezistencën dhe idealin tonë, por që në vend të kësaj u bë thirrje e fuqishme për drejtësi dhe liri. Ambasadori William Walker që vizitoi Reçakun, pa me sytë e tij mizorinë dhe guxoi të thotë të vërtetën para gjithë botës”, shtoi ai në postimin në Facebook.

Tutje, ai ka theksuar se “Deklarata e tij e fuqishme se ajo që ndodhi në Reçak është krim kundër njerëzimit bëri jehonë në arenën ndërkombëtare”.

“Ai u bë zëri ynë dhe mik i paharrueshëm i popullit të Kosovës. Sot, përulemi para martirëve të Reçakut dhe shprehim mirënjohje të thellë për miqtë ndërkombëtarë. Lavdi viktimave të Reçakut dhe falënderim i përjetshëm për ata që na ndihmuan në rrugën drejtë lirisë”, deklaron Rama.

Mes tjerash, ai shton se “Reçaku mbetet jo vetëm një plagë e dhimbshme, por edhe një shembull i unitetit dhe humanizmit që triumfon mbi barbarinë”./Telegrafi/