Evropianët, “më të frikësuar” se të tjerët nga presidenca e dytë e Trumpit në SHBA – zbulon një sondazh

Aleatët e SHBA-së në Evropë janë më pesimistë për rendin e ardhshëm global nën udhëheqjen e Donald Trump.

Kështu, siç shkruan Euronews, përcjell Telegrafi, ka zbuluar një sondazh i kryer për Këshillin Evropian për Marrëdhëniet me Jashtë (ECFR) dhe për raportin e Evropës të Universitetit të Oksfordit.

Në këtë kontekst, thuhet se në BE dhe MB, shumica e njerëzve e shohin një administratë të dytë Trump si të dëmshme për qytetarët amerikanë, vendet e tyre dhe zgjidhjen e konflikteve globale.

Në mënyrë të ngjashme, opinioni publik për Trump është dukshëm “pesimist” edhe në Korenë e Jugut.

“Çfarë kemi të përbashkët ne [BE dhe Koreja e Jugut]? Ne jemi të dy aleatë të SHBA-së që varemi nga SHBA-ja për sigurinë tonë”, ka thënë për Euronews, Timothy Garton Ash, historian në Universitetin e Oksfordit dhe bashkëautor i studimit.

Por paparashikueshmëria e Trump në politikën e jashtme, veçanërisht në qasjen e tij ndaj NATO-s dhe luftës në Ukrainë, po ngre gjithnjë e më shumë shqetësime në të gjithë Evropën nëse SHBA do të mbështeste aleatët e saj transatlantikë në rast të një konflikti.

Megjithatë, ECFR shton se BE është e ndarë në perceptimin e saj për presidentin e zgjedhur të SHBA-së dhe marrëdhëniet që blloku duhet të ketë me vendin.

“Kam frikë se ndikimi i Trump do të jetë jo vetëm për të ndarë Perëndimin, por për të ndarë Evropën. Dhe kjo është një sfidë e madhe për ne evropianët”, shtoi Garton Ash.

Ai kujtoi vizitën e fundit të italianes Giorgia Meloni në Mar-a-Lago ose mbështetjen e zëshme të kryeministrit hungarez Viktor Orbán për Trump.

Çdo përpjekje e BE-së për të arritur unitet në kundërshtim të drejtpërdrejtë me Trump mund të çojë në ndarje të mëdha si midis dhe brenda shteteve anëtare, thuhet në raport.

Në të gjithë bllokun, 21% e të anketuarve i shohin Shtetet e Bashkuara si një aleat që ndan interesa dhe vlera, 50% e konsiderojnë atë si një partner të domosdoshëm, ndërsa 3% e konsiderojnë atë një rival në konflikt.

Ndryshe nga perceptimet evropiane, në vende të tilla si India, Kina dhe Rusia, njerëzit janë më optimistë për kthimin e Trump në Shtëpinë e Bardhë, duke e konsideruar atë të dobishme për vendet e tyre dhe për paqen globale.

Raporti ia atribuon këtë optimizëm premtimeve të Trump për t’i dhënë fund luftërave në Ukrainë dhe Lindjen e Mesme, megjithëse paralajmëron se dështimi për të përmbushur këto premtime mund të ndryshojë opinionin publik në vitet e ardhshme.

Për shembull, 82% e të anketuarve në Indi mendojnë se presidenca e Trump do të jetë e mirë për paqen në botë, një pozicion i përbashkët nga 57% e qytetarëve në Arabinë Saudite dhe më shumë se gjysma (52%) në Kinë. /Telegrafi/