Taravari për deklaratën e Gashit: Gjuha shqipe nuk është e barabartë me atë maqedonase

Ministri i Shëndetësisë Arben Taravari dhe njëri nga liderët e VLEN-it, ka komentuar deklaratën e Afrim Gashit, i cili tha se gjuha shqipe nuk është zyrtare, por e përkthyer. Taravari theksoi se këto janë lojëra fjalësh, ndërsa tha se “gjuha shqipe nuk është e barabartë me atë maqedonase”.

“Mund të kemi lojë fjalësh sa të duam, gjuha shqipe nuk është e barabartë e me gjuhën maqedonase, këtu pajtohemi të gjithë. Para vitit 1991 gjuhë zyrtare në Maqedoni kanë qenë gjuha maqedonase, shqipe dhe turke. Tash është gjuha maqeodnase dhe gjuha e 20 përqind të popullatës që e flasin atë gjuhë. Ne duhet të punojmë në këtë drejtim, pasi gjuha shqipe nuk është e barabartë me atë maqedonase. Ne duhet të inisistojmë që gjuha shqipe të qëndrojë edhe si fjalë, jo si përqindje”, tha Taravari.

Ai foli edhe për ndryshimet kushtetuese, ndërsa tha se nuk mund të bëhen pa OBRM-PDUKM-në.

Lexo po ashtu Gashi tha se gjuha shqipe nuk është zyrtare, por e përkthyer – Fronti Europian kërkon dorëheqjen e tij

“Për ndryshimet kushtetuese është e vërtetë se ne e kemi thënë, edhe kur kemi negociouar me OBRM-PDUKM-në, një nga shtyllat kanë qenë eurointegrimet. Edhe presidentja tha se Maqedonia e Veriut nuk ka alternativë tjetër, por pa OBRM-PDUKM-në nuk mund të bëhen ndryshimet kushtetuese”, tha Taravari./Telegrafi/