Shefi i OBSH-së në aeroportin e Jemenit gjatë sulmeve izraelite, OKB jep alarmin

Shefi i Kombeve të Bashkuara ka denoncuar “përshkallëzimin” e armiqësive midis rebelëve Houthi të Jemenit dhe Izraelit, duke i quajtur sulmet e IDF-së ndaj objektivave përfshirë në aeroportin në Sanaa “veçanërisht alarmante” pasi vendi u sulmua ndërsa kreu i Organizatës Botërore të Shëndetësisë ishte gati për të hipur në një aeroplan.

Izraeli goditi objektiva të shumta të lidhura me lëvizjen Houthi të lidhur me Iranin në Jemen, duke përfshirë aeroportin ndërkombëtar në kryeqytetin, Sanaa, shkruan the Guardian.

Një zëdhënës i Sekretarit të Përgjithshëm të OKB-së, Antonio Guterres, tha në një deklaratë: “Sekretari i Përgjithshëm dënon përshkallëzimin midis Jemenit dhe Izraelit. Sulmet ajrore izraelite sot në aeroportin ndërkombëtar të Sanaas, portet e Detit të Kuq dhe stacionet e energjisë në Jemen janë veçanërisht alarmante”.

“Sulmet ajrore të sotme pasojnë rreth një vit veprimesh përshkallëzuese nga Houthi në Detin e Kuq dhe në rajon që kërcënojnë civilët, stabilitetin rajonal dhe lirinë e lundrimit detar”, shtoi ai.

Kreu i Organizatës Botërore të Shëndetësisë (OBSH), Tedros Adhanom Ghebreyesus, deklaroi në një postim në rrjete sociale se ai ishte gati të hipte në një aeroplan në aeroport kur u sulmua nga ajri.

Një anëtar i ekuipazhit në aeroplan u plagos dhe të paktën dy persona u raportuan të vrarë në aeroport.

“Kulla e kontrollit të trafikut ajror – vetëm pak metra larg vendit ku ishim – dhe pista u dëmtuan. Do të duhet të presim që aeroporti të riparohet përpara se të largohemi. Unë dhe kolegët e mi të OKB-së dhe WHO jemi të sigurt. Ngushëllimet tona të përzemërta për familjet, të dashurit e të cilëve humbën jetën në sulm”, tha Tedros.

Bëhet e ditur se ai kishte qenë në Jemen për të negociuar lirimin e stafit të OKB-së të ndaluar nga Houthi dhe për të vlerësuar situatën humanitare.

Ndërkohë, kryeministri i Izraelit, Benjamin Netanyahu, tha se forcat ajrore izraelite sulmuan objektivat Houthi në vijën bregdetare dhe në Sanaa, duke shtuar: “Ne jemi të vendosur për të prerë këtë krah terrorist të boshtit të keq të Iranit. Ne do të këmbëngulim në këtë derisa të përfundojmë detyrën”. /Telegrafi/