Sindikalisti Sharka: Pesticidi i gjetur te mandarinat shqiptare ka 4 vjet që nuk lejohet me ligj

Ish-kryetari i Sindikatës së Fermerëve, Eduart Sharka, foli në lidhje me bllokimin e mandarinave shqiptare nga BE.

Sipas Sharkës kjo gjë pritej sepse pothuajse çdo tre muaj sipas tij, sistemi i kontrollit të BE konstaton raste të tilla.

Ai ngriti alarmin duke thënë se ky pesticid kishte 4 vjet që ishte hequr me ligj nga BE dhe ndalohej dhe në Shqipëri.

“E prisja sepse jo për mandarinat por pothuajse çdo tre muaj kemi raste të tilla ku Sistemi i Kontrollit të Sigurisë Ushqimore të Bashkimit Europian, herë pas here i nxjerr produktet tona mbi noramtivën e BE-së për pesticide të caktuara. Ky rast është alarmant sepse është zbuluar një preparat që ka 4 vjet që me ligj është hequr nga lista e përdorimit nga BE dhe në vendin tonë po ashtu”, deklaroi Sharka në Euronews Albania.

“Tjetra është që kemi të bëjmë me fruta dhe ajo që është alarm për ne është që ne vihemi përballë faktit vetëm kur kontrollohemi nga BE dhe pyetja e madhe vjen; A kontrollohemi ne në vendin tonë dhe pse nuk zbulohet këtu, që do të thotë që AKU është kthyer në një insitucion që vepron pos faktum. Domethënë AKU vepron gjithmonë pas konstatimit të BE dhe puna e tyre është reduktuar duke vendosur vetëm gjoba pas konstatimeve nga BE”.

“Natyrisht që në tregun tonë dhe të Kosovës këto mandarina qarkullojnë por janë eksportuar me qindra ton dhe shumica kanë dalë të rregullta jo për të ulur alarmin por nuk është gjithçka zi, gjithsesi në tregun tonë dhe të Kosovës qarkullojnë këto produkte”, tha Eduart Sharka.