Mundësia për punë dhe studime në SHBA, Gazmend Ilazi tregon detaje për programet nga Ambasada Amerikane në Shkup

Koordinatori për programe arsimore në Ambasadën Amerikane në Shkup, Gazmend Ilazi, është i ftuari i radhës në emisionin “PodGo” me të cilin kemi diskutuar për mundësitë që ofron Qeveria amerikane për studime, punë dhe trajnime atje për shtetasit e Maqedonisë së Veriut.

Ai tregoi se të rinjtë, studentët dhe profesorët kanë interesim për këto programe, megjithatë ai nuk është i kënaqur. Pret që në të ardhmen interesimi për të shfrytëzuar këto mundësi të rritet. Gazmendi na tregoi se për momentin kanë shumë programe që janë aktive dhe i ftoi të interesuarit të aplikojnë.

“Punojmë me përkushtim më të madh për të pasur sa më shumë aplikantë të cilët do të shijojnë mundësinë e të studiuarit në SHBA. Mundohem të jem i kapshëm dhe t’u shërbej të gjithë atyre që kanë nevojë dhe mendojnë që mund unë t’u kryej punë. Kemi shumë programe dhe ato janë të ndara në grupmosha dhe sipas profesionit. Disa janë programe edukative-arsimore, dhe disa janë programe profesionale, pasi këta të fundit kanë për fokus ngritjen e shkathtësive profesionale. Programet arsimore mundësojnë mundësi tjera për studime master, doktoraturë etj”.

“Kemi programe për profesorë, për nxënës të shkollave të mesme. Interesim ka, por nuk jam shumë i kënaqur, pasi sa më shumë ka konkurrencë mund ta rrisim numrin e bursave për vitin e ardhshëm. Asnjëherë nuk e përzgjedhim ata që nuk i plotësojnë kushtet, ndërsa kur ka konkurrencë e zgjedhim atë që është më i mirë”.

“Përzgjedhja bëhet nga diplomatë amerikanë. Ata kanë kohë të mjaftueshme që të bëjnë listën e shkurtë për ata të cilët duhet t’i thirrim në intervistë. Komisioni çdo herë mundohet që të ketë laramani të fituesve, por asnjëherë nuk bëhet kompromis me cilësinë e kandidatëve”, tha mes tjerash Gazmendi.

Ai tregoi që numri i pjesëmarrësve në këto programe që financohen nga Qeveria amerikane që nga pavarësimi i RMV-së është rreth 3700.

Ai gjithashtu tregoi se vazhdimisht manovrojnë me programet dhe mundësitë që i ofrojnë, gjegjësisht nëse shohin se nuk ka interesim për program të caktuar ata e shuajnë atë dhe e zëvendësojnë./Telegrafi/

*Ky emision mundësohet nga Porsche, KFC, Neotel, CityFashion, Ujë Rugovë, Zgjimi dhe Uniqa.