“Këtu më kini, si dikur, do të jem përgjithmonë”, letra rrëqethëse e prindërve të Martin Canit

Familja e Martin Canit, 14-vjeçarit që humbi jetën tragjikisht pasi u godit me thikë nga bashkëmoshatari i tij, ka bërë publike një letër falënderimi për të gjithë ata që i qëndruan pranë në këto momente të rënda.

Në letër, prindërit e Martinit, Angel dhe Florina Cani, shprehin mirënjohje për mbështetjen e pakushtëzuar dhe solidaritetin që kanë marrë nga miq, të afërm dhe gjithë komuniteti shqiptar.

Ata theksojnë se ëndrra e Martinit do të vazhdojë të jetojë përmes kujtimit të tij, duke mbetur një burim frymëzimi për të gjithë.

Në mesazhin prekës të letrës thuhet:

“Ëndrra vazhdon”

Familja kujton Martinin si një djalë plot ëndrra dhe ambicie, i cili frymëzonte të gjithë përreth me buzëqeshjen dhe përkushtimin e tij.

Ata shprehen se dhoma ku Martini ëndërronte dhe punonte për të ardhmen e tij do të mbetet një strehë për çdo mik dhe admirues të tij.

Ky vend nuk është thjesht një shtëpi, por një simbol i pasionit, punës dhe përkushtimit që Martini kishte për futbollin dhe jetën.

Familja gjithashtu falënderon nga zemra të gjithë ata që kanë qenë pranë në këtë moment të vështirë: miqtë, të afërmit, mësuesit, trajnerët dhe tifozët kuq e zi, të cilët mbajtën një minutë heshtje në stadiumin “Air Albania”.

Një mirënjohje e veçantë shkon edhe për Federatën Shqiptare të Futbollit dhe Presidentin Armando Duka për mbështetjen dhe nderimin e bërë.

Letra përfundon me një mesazh të Martinit, i cili mbetet në kujtimet e të gjithëve:

“Këtu më kini, si dikur. Unë jam këtu, dhe do të jem përgjithmonë.”

Familja shpreh bindjen se ëndrra e Martinit nuk do të ndalet kurrë dhe se kujtimi i tij do të vazhdojë të ndriçojë rrugën e të gjithë atyre që besojnë në guxim dhe në të pamundurën.

“Ëndrra vazhdon… dhe Martini do të jetë gjithmonë mes nesh.”