Shoqata “Orkide” bashkon gratë në Prizren për aktivizmin kundër dhunës deri tek punimet artizanale

Në kuadër të fushatës së 16 ditëve të aktivizmit kundër dhunës me bazë gjinore, shoqata e grave “Orkide” në Prizren ka realizuar diskutimin mbi të drejtat e grave dhe qasjen e tyre në drejtësi.

Në këtë aktivitet, sipas njoftimit, folëse ka qenë ministrja e Drejtësisë, Albulena Haxhiu.

Në të njëjtën kohë është hapur edhe ekspozita me punimet artizanale të anëtareve të kësaj shoqate, raporton Telegrafi.

Ministrja e Drejtësisë, Albulena Haxhiu para të pranishmëve ka folur lidhur me veprimet e ndërmarra nga ky dikaster qeveritar për parandalimin dhe eliminimin e dhunës në familje, por edhe qasjen e grave në drejtësi. Ajo ka pranuar se ka sfida shkaku i mendësisë patriarkale, por ka kërkuar unitet mes grave për tejkalimin e vështirësive aktuale.

“Është e rëndësishme të theksohet se vajzat dhe gratë në Republikën e Kosovës duhet të trajtohen njësoj si djemtë ashtu edhe burrat. Pra ka një përkushtim shumë të madh të institucioneve në këtë drejtim. Por e kuptoj që duke u përballur me mentalitetin patriarkal kemi pasur sfida gjatë rrugës, por kur jemi bashkë, kur jemi me njëra tjetrën, kur e ndihmojmë njëra tjetrën, kur jemi solidare, jam e bindur që pavarësisht sfidave që i kemi gjatë rrugës gjithçka apo çfarëdo guri që na del në mes ne mund ta tejkalojmë”, ka thënë Haxhiu.

Ndërkaq kryetarja e shoqatës së grave “Orkide”, Sevgi Kervan ka theksuar se në kuadër të fushatës 16 ditore janë realizuar aktivitete të ndryshme ndërgjegjësuese kundër dhunës në familje, përfshirë vendosjen e luleve artizanale me mesazhe ditë me parë në njërën prej urave në qendër të Prizrenit.

“Ndërkaq tani nga njëra anë diskutojmë të drejtat e grave dhe qasjen e tyre në drejtësi, por në të njëjtën kohë hapim edhe ekspozitën, ku shohim edhe fuqinë e grave të mishëruara në punimet e bukura artizanale të krijuara nga duart e tyre të buta”, ka thënë Kervan.

Ajo ka theksuar se kjo shoqatë përmes këtyre aktiviteteve vazhdon që ta promovojë fuqinë e gjithanshme të gruas, raporton Telegrafi.

“Me punimet artizanale, ruajmë traditat tona, ndërkohë që i përshtatim ato me kohën moderne për t’i transmetuar vlerat tek brezat e ardhshëm. Përmes këtij angazhimi, ofrojmë ide e hapësira të reja pune për gratë, duke i inkurajuar ato që të fuqizohen edhe ekonomikisht”, ka thënë Kervan.

Aktivitetet në fjalë janë realizuar në Qendrën “Yunus Emre” në Prizren. /Telegrafi/