Jack Smith kërkon pushimin e çështjeve ndaj Trump për ndërhyrje në zgjedhje dhe dokumenteve sekrete

Prokurori i posaçëm Jack Smith u ka kërkuar gjyqtarëve që të ndalojnë një çështje të ndërhyrjes federale në zgjedhje, dhe një çështje të dokumenteve të klasifikuara kundër Donald Trump, ndërsa ai do të bëhet presidenti i ardhshëm i SHBA.

Në dokumentet e reja të paraqitura të hënën, Smith u tha gjyqtarëve se çështjet duhet të mbyllen për shkak të një politike të Departamentit të Drejtësisë, që ndalon ndjekjen penale të një presidenti në detyrë, transmeton Telegrafi.

Trump ishte deklaruar i pafajshëm në të dyja rastet. Njëra lidhet me përpjekjet e tij për të përmbysur humbjen e tij në zgjedhjet e vitit 2020 ndaj presidentit Joe Biden, dhe tjetra lidhet me trajtimin e dosjeve të ndjeshme pasi ai u largua nga Shtëpia e Bardhë.

“Ka qenë prej kohësh qëndrimi i Departamentit të Drejtësisë, që Kushtetuta e Shteteve të Bashkuara ndalon aktakuzën federale dhe ndjekjen penale pasuese të një presidenti në detyrë”, shkroi Smith në një dosje në çështjen zgjedhore.

“Ky rezultat nuk bazohet në meritat ose forcën e çështjes kundër të pandehurit”, shtoi Smith në dosjen me gjashtë faqe.

Një gjyqtar duhet të nënshkruajë për të dyja rastet që ato të pushohen zyrtarisht. Në një deklaratë, ekipi i Trump tha se masa për t’i dhënë fund rasteve ishte “një fitore e madhe për sundimin e ligjit”.

“Populli amerikan e rizgjodhi presidentin Trump me një mandat dërrmues për ta bërë Amerikën përsëri të madhe”, tha zëdhënësi i Trump, Steven Cheung.

“Populli amerikan dhe presidenti Trump duan një fund të menjëhershëm të armatimit politik të sistemit tonë të drejtësisë dhe ne mezi presim të bashkojmë vendin tonë”, shtoi ai. /Telegrafi/