Botë Nga Bota Amerika

Pse Trump kurrë më nuk do të përballet me gjyqin për mashtrim zgjedhor?

Para 2 muajve

Presidenti i sapozgjedhur amerikan, Donald Trump do të jetë i liruar nga rasti për mashtrim zgjedhor edhe pasi të largohet nga zyra në vitin 2029, ka thënë një ish-prokuror federal.

Neama Rahmani i tha Newsweek se afati i ndjekjes penale do të ketë përfunduar deri në momentin kur 78-vjeçari të largohet nga zyra, dhe prokurorët nuk do të jenë në gjendje të ringjallin rastin.

Trump u akuzua në Washington, D.C., për katër raste të lidhura me përpjekjet për të përmbysur rezultatet e zgjedhjeve të vitit 2020, në prag të trazirave të 6 janarit 2021 në Kongresin amerikan.

Republikani ka deklaruar me dhjetëra herë se është i pafajshëm dhe se rasti është pjesë e një “gjuetie politike ndaj tij”, transmeton Telegrafi.

Rahmani, tashmë president i firmës ligjore West Coast Trial Lawyers në Kaliforni, tha se të gjitha ndjekjet penale federale ndaj Trumpit tani kanë marrë fund.

“Pasi rasti për mashtrim zgjedhor të mbyllet, nuk mund të hapet sërish pasi Trump të largohet nga zyra sepse afati i ndjekjes do të ketë kaluar. Afati për shumicën e krimeve federale është pesë vjet. Tani që Trump ka fituar, ndjekjet penale kanë përfunduar”, tha ai.

Profesori i së drejtës në Universitetin e New Yorkut, Stephen Gillers, ra dakord se çështja kundër Trumpit tani është e mbyllur dhe se republikani mund t’i kërkojë Prokurorit të Përgjithshëm në detyrë të shkarkojë prokurorin special, Jack Smith.

“Trump ndoshta nuk mund ta bëjë vetë, pasi ai nuk e ka emëruar Smithin. Prandaj [ish-presidenti Richard] Nixon kishte nevojë për dikë tjetër për të shkarkuar Archibald Coxin, gjë që çoi në masakrën e së shtunës në mbrëmje. Këtë do ta bëjë Prokurori i Përgjithshëm në detyrë, pasi do të duhet kohë para se të konfirmohet një Prokuror i Përgjithshëm”, tha Gillers.

Në maj të vitit 1973, Prokurori i Përgjithshëm, Elliott Richardson, ish-student i Coxit, e emëroi atë si prokuror të posaçëm për Watergate.

“Kur hetimi i Senatit zbuloi ekzistencën e audio-regjistrimeve të urdhëruara nga presidenti Richard Nixon, Prokurori i Posaçëm Cox i kërkoi ato me fletëthirrje nga punëdhënësi i tij”, thuhet në faqen e internetit të Departamentit të Drejtësisë.

Pasi dy apelime të fletëthirrjeve u refuzuan, presidenti ofroi t’i jepte Senatit dhe Coxit përmbledhje me shkrim të asaj që ndodhej në audio-regjistrimet. Cox e refuzoi marrëveshjen. Nixon më pas i urdhëroi Richardsonit ta shkarkonte atë. Por, prokurori i përgjithshëm refuzoi, dhe e njëjta gjë ndodhi me Zëvendës Prokurorin e Përgjithshëm William Ruckelshaus.

Nixon iu drejtua atëherë Solicituesit të Përgjithshëm, Robert Bork, i cili e ekzekutoi urdhrin. Ngjarja u bë e njohur si ‘Masakra e Shtunës Mbrëma’.”

Trump i tha drejtuesit të radios konservatore Hugh Hewitt më 26 tetor se, nëse ai zgjidhet president, do ta shkarkojë Smith “brenda dy sekondash” pas marrjes së detyrës.

Prokurori i Përgjithshëm, Merrick Garland e emëroi Smithin si një këshilltar të posaçëm të pavarur për të mbikëqyrur çështjet federale ndaj Trumpit.

Garland kërkoi të shmangte një konflikt interesi: nëse Departamenti i Drejtësisë nuk është drejtpërdrejt duke ndjekur penalisht Trumpin, atëherë nuk duket sikur administrata Biden po e persekutonte Trumpin.

Greg Germain, profesor i së drejtës në Universitetin Syracuse në New York, deklaroi se Smith do të japë dorëheqje para se t’ia lejojë kënaqësinë e shkarkimit Trumpit.

Ndërkohë, Newsweek raporton se zyra e Jack Smithit ka shpenzuar të paktën 50 milionë dollarë për ndjekjen e pasuksesshme të Donald Trumpit.

Rahmani i tha Newsweek se aktakuzat e Smithit kanë rezultuar edhe me harxhime ‘koti’ të parave.

“Fundja, ndjekjet penale të Smithit ishin një humbje e parave të taksapaguesve. Ai nuk arriti afër gjykimit të asnjërit prej rasteve dhe aktakuzat për mashtrim zgjedhor nuk zbuluan ndonjë provë të re të rëndësishme krahasuar me Komitetin e 6 Janarit”, tha ai.

Rahmani tha se Smith “u vonua shumë për të ngritur akuza për të dyja rastet”.

Ai gjithashtu tha se Smith “dështoi të parashikonte se Trumpi do të vononte rastet deri pas zgjedhjeve dhe do të fitonte përmes mocioneve dhe apelimeve, në mënyrë që të mos ndiqej penalisht”.

Avokati me qendër në Los Angelos, John Perlstein, deklaroi se shpenzimet e Smithit ishin një “humbje totale e burimeve”.

Ai tha se provat në çështjen për mashtrim zgjedhor ishin “në rastin më të mirë të paqarta për ta ndjekur penalisht deri në këtë masë”.

“Burimet qeveritare duhet të shpërndahen më efektivisht, dhe e them këtë si dikush që nuk është mbështetës i Trumpit. Të gjitha këto raste nuk kishin kuptim për mua. Dhe tani që duket se do të zhduken, ato para u hodhën kot”, tha ai.

Ndryshe, sot është shtyrë vendimi nëse do t’i falet dënimi Trumpit në rastin me Stormy Daniels. Prokurorët pohuan se 78-vjeçari falsifikoi rimbursimet për avokatin e tij të atëhershëm, Michael Cohen, për një pagesë prej 130 mijë dollarësh drejtuar yllit të filmave për të rritur, në këmbim të heshtjes së saj lidhur me një aferë të pretenduar me Trumpin. /Telegrafi/