Fillojnë përgatitjet për edicionin e tretë të ‘Zurich Shqip Up Comedy Festival’

Përgatitjet për festivalin e tretë të stand-up komedisë shqiptare në Zvicër, Zurich Shqip Up Comedy, po zhvillohen me entuziazëm të madh.

Ky event i shumëpritur do të mbahet më 18 dhe 19 tetor 2024 në “Stadthalle Dietikon” në Cyrih, ku disa nga aktorët më të njohur të komedisë shqiptare do të ngjiten në skenë për të argëtuar publikun shqiptar që jeton atje.

Në disa fotografi ekskluzive të siguruara nga Telegrafi, shihen përgatitjet finale në sallë, ku stafi është duke punuar për të siguruar një përvojë të shkëlqyer për të pranishmit.

Skena e madhe e “Stadthalle Dietikon” është duke u përshtatur për të krijuar një ambient komod dhe argëtues për këtë festival unik, i cili synon të sjellë një atmosferë të ngrohtë dhe plot humor mes shqiptarëve të diasporës.

Ky festival është mirëpritur me entuziazëm nga komuniteti shqiptar në Zvicër, i cili është gjithnjë i gatshëm të mbështesë artin dhe kulturën e vendlindjes.

Aktorët e ftuar janë të përgatitur për të sjellë një program të larmishëm me batuta që reflektojnë humorin shqiptar, duke krijuar një atmosferë festive dhe të paharrueshme për të gjithë të pranishmit. /Telegrafi/