Kosova Makers League hap aplikimet për Edicionin e Shtatë të Garës së Robotikës, KML Open 2024-25

Kosova Makers League është organizatë që përmes edukimit jo-formal, synon të pajisë nxënësit me aftësi të buta dhe teknike që i përgatisin ata për sfidat e së ardhmes.

Pas suksesit të edicionit të kaluar të garës së robotikës, kjo organizatë sot zhvillon garën më të madhe të robotikës në rajon.

Me 18 Shtator 2024, Kosova Makers League ka hapur aplikimet për edicionin e shtatë të Garës së Robotikës, KML Open 2024-25, me temën “Robotika Sportive”. Ftohen të gjitha institucionet edukative që punojnë me fëmijë të grupmoshës 6-14 vjeç, të bëhen pjesë e kësaj gare argëtuese dhe edukative.

 Në këtë edicion të garës, përveç ekipeve të vjetra pjesëmarrëse, do të pranohen edhe 100 ekipe të reja, të cilat për herë të parë do të marrin pjesë në Garën e Robotikës KML Open.

Çdo ekip do të pajiset me katër robotë edukativë micro: Maqueen Plus, që do të përdoren për realizimin e sfidave të raundeve të garës. Ekipet përbëhen nga pesë anëtarë, katër prej të cilëve janë nxënës dhe një mentor, i cili mund të jetë mësimdhënës, prind ose një vullnetar i autorizuar nga institucioni pjesëmarrës.

Në edicionin e kaluar, Kosova Makers League arriti një sukses të madh duke pajisur 250 institucione edukative me robotë edukativë, në të gjithë vendin. Me këtë arritje, KML ka përmbushur njërin prej disa qëllimeve të saj – pajisjen e 50% të shkollave publike në Kosovë me robotë edukativë falas.

Edhe këtë vit, KML synon të përfshijë sa më shumë nxënës në fushat STEAM përmes kësaj gare dhe aktiviteteve edukative që zhvillohen në kuadër të saj, duke u ofruar atyre njohuri të reja dhe aftësi praktike.

Afati i fundit për aplikim në këtë edicion të garës është 18 tetor!

Aplikoni për pjesëmarrjen e ekipit tuaj në Garën e Robotikës KML Open 2024-25, duke klikuar në këtë link.

Për më shumë informata rreth tërë organizimit të garës për këtë edicion, klikoni në këtë linku.

Edicioni i Shtatë i Garës së Robotikës – Kosova Makers League Open 2024-25 po mbështetet nga Fondacioni “Unë e Du Kosovën”, Fondacioni BONEVET Prishtina, KEP Trust dhe Korporata Rugove.