LSDM: Mësimdhënësit nuk do të marrin rritjen e premtuar të pagave për 12% në shtator

Partia opozitare maqedonase LSDM, në një kumtesë për media thotë se revolta e mësuesve është e madhe nga pushteti i OBRM-PDUKM-së. Nga LSDM thonë se mësimdhënësit nuk do ta marrin rritjen e pritshme të pagave prej 12% në shtator.

“OBRM-PDUKM e ka thyer premtimin për përmirësimin e arsimit. Të gjithë e dinë se nuk ka arsim cilësor pa investim në kuadrin arsimor. Investimi te mësuesit është një investim për të ardhmen e fëmijëve tanë, por edhe të gjithë vendit. Por Mickoski dhe Janevska nuk e kanë konceptin e arsimit dhe as synojnë rritjen e pagave të mësimdhënësve. Përsëri, OBRM-PDUKM i sheh të gjithë punëtorët si fuqi punëtore të lirë. Qeveria e LSDM-së i rriti pagat gjatë krizës më të madhe shëndetësore dhe ekonomike”.

“Me LSDM-në, çdo vit, në shtator, mësimdhënësit e nisnin vitin e ri shkollor me pagë më të lartë. Në shtator 2019 dhe 2020 ata morën një rritje prej 5 për qind secili, në shtator 2021, 10 për qind. Në shtator të vitit 2022 dhe 2023, LSDM dy herë i ngriti pagat e të arsimuarve në 15 për qind. LSDM ka rritur pagat në arsim për mbi 55 për qind”.

“LSDM edhe sot është në anën e mësimdhënësve. Kërkojmë që Qeveria e Mickoskit ta përmbushë premtimin dhe t’u rriten pagat. Ka para! Është çështje e përcaktimit të prioriteteve ku do të investohen ato para. Mësuesit meritojnë paga më të larta dhe është obligim i Mickoskit dhe qeverisë së tij që ta realizojnë atë rritje”, thonë nga LSDM./Telegrafi/