Derbi shqiptar dhe sfida të nxehta në javën e dytë

Të dielën, më 18 gusht, rikthehen emocionet e Ligës së Parë të Maqedonisë së Veriut, me disa ndeshje që pritet të sjellin spektakël në fushën e gjelbër. Edhe kjo javë sjell dy përballje të nxehta mes ekipeve shqiptare, ashtu sikurse ishte javën e parë.

Gostivari dhe Shkupi, pas barazimeve në javën hapëse, do të kërkojnë fitoren e parë të sezonit në një duel të fortë. Ndeshja do të zhvillohet në stadiumin e qytetit në Shtip, ku Gostivari luan si nikoqir. Ndërkohë, Struga, kampioni aktual, pas fitores minimale ndaj Tikveshit, pret debutuesin Besa nga Dobërdolli, e cila pësoi humbje nga Shkëndija në javën e parë. Kjo ndeshje do të jetë një sfidë e madhe për ekipin e Besës.

Ekipi kuq e zi nga Tetova, Shkëndija, përballet me Rabotniçkin e Shkupit në një tjetër ndeshje interesante, ku të dyja ekipet do të kërkojnë të tregojnë forcën e tyre. Voska Sport nga Ohri, pas barazimit ndaj Shkupit, është mysafire e Tikveshit dhe synon një tjetër rezultat pozitiv nën drejtimin e trajnerit Seit Kreka.

Në duelet tjera të së dielës, do të përballen Sileksi me Breran. Të gjitha ndeshjet do të fillojnë në ora 17:00, përveç takimit mes Vardarit dhe Pelisterit, i cili luhet në ora 20:00. Kjo javë premton një futboll të nivelit të lartë, me shumë emocione dhe rivalitet.