Profesori i kriminalistikës: Shteti dështoi ta risocializojë Faton Hajrizin

Mensut Ademi, profesor i kriminalistikës, ka thënë se institucionet e Kosovës kanë dështuar ta risocializojnë Faton Hajrizin, i dyshuar për vrasjen e një polici në Serbi.

Ademi në RTV Dukagjini, tha se vetë shkenca tregon që nëse një i mitur nuk rehabilitohet, nga ai mund të dalë një kriminel profesional.

“Më dhimbeset ky djal, në bazë të indiceve mund të themi është ai apo jo, s’ka info zyrtare. Ka qenë i mitur, institucionet nuk kanë arritur ta socializojnë e rehabilitojnë. Shkenca thotë se nëse nuk rehabilitohet, nga një i mitur mund të dalë një kriminel profesional”, vijoi ai.

Tutje ai tha se Serbia mund ta shfrytëzojë këtë rast për qëllime të saja.

Lexo po ashtu Vrasja e policit në Serbi, Vuçiq thotë se po informohet nga Kina

Ndryshe, në Lloznicë – qytetin perëndimor në Serbi, në kufi me Bosnje e Hercegovinën – në orët e para të së enjtes u vra një polic serb, ndërsa një tjetër është plagosur rëndë.

Policia serbe është në kërkim të sulmuesit.

Ministria e Brendshme e Serbisë ka thënë se në vendngjarje është gjetur një pasaportë e të dyshuarit, e lëshuar nga autoritetet e Kosovës, me emrin e Artan Hajrizit – i lindur më 1991 – dhe një dokument tjetër gjerman identifikimi.

Më herët gjatë ditës, Artan Hajrizi deklaroi se gjendet në Gjermani dhe se i vëllai, Fatoni, ia ka vjedhur pasaportën e tij.