Thiago Motta prezantohet si trajner i Juventusit, flet rreth shumë gjërave në konferencën për shtyp

Thiago Motta u zbulua si trajneri i ri i Juventusit në një konferencë për shtyp sot (e enjte), më 18 korrik, në stadiumin Allianz në Torino.

Një ish-reprezentues i Italisë, Motta ka nënshkruar një kontratë tre-vjeçare me Bianconerët dhe ka nisur para-sezonin me gjigantët e Serie A më 10 korrik.

Gjatë konferencës së tij të parë për shtyp si trajneri i ri i Juventusit, ish-trajneri i Bolognës preku disa çështje domethënëse, duke përfshirë afatin kalimtar, lojtarët e rinj të firmosur tashmë nga klubi dhe ata që përflitet se nuk janë pjesë e planeve.

Motta tha se dëshiron të shohë një ekip ambicioz që është “i lumtur” pas çdo ndeshje dhe pohoi se aktualisht nuk po mendon të ndryshojë kapitenin.

Lexo po ashtu Thiago Motta bëri një kërkesë të veçantë në klub - kërkoi fotografitë dhe emrat e secilit që punon në qendrën stërvitore

“Së pari ju falënderoj që jeni këtu. Jam i lumtur dhe i kënaqur që jam trajner i një klubi historik dhe ambicioz dhe jam i bindur se do të hapim një cikël interesant. Ditët e para ishin të mahnitshme. Kam gjetur struktura fantastike dhe njerëz kompetentë që po më ndihmojnë. Falënderoj tifozët për pritjen e tyre të ngrohtë. Jam shumë i lumtur që jam këtu me ju”, ka thënë fillimisht Motta.

“Identiteti? Dua një ekip krenar dhe të lumtur pas çdo ndeshje. Kjo do të thotë se ne kemi dhënë më të mirën. Kjo është ajo që dua të shoh çdo herë.”

“Pse Juventusi dhe objektivat afatshkurtra? Është një klub ambicioz dhe historik. Arrij në momentin e duhur. Do të jetë një cikël interesant. Duhet të përgatitemi mirë. Jemi në një moment të rëndësishëm të sezonit, ndaj duhet të jemi plotësisht të fokusuar dhe të gatshëm për të konkurruar në një nivel të lartë në çdo ndeshje. Këto janë objektivat sot, pastaj do të shohim”.

Lexo po ashtu Shtatë lojtarë janë jashtë projektit i Thiago Mottas te Juventusi

“E dija se do të vija në një klub fantastik. Strukturat tona janë të mahnitshme dhe ne kemi gjithçka që na nevojitet për të bërë një punë të shkëlqyer. Ne do t’i përballojmë këto tre vite me entuziazëm dhe energji pozitive, duke u përpjekur të luajmë sa më shumë ndeshje, që do të thotë se skuadra po ecën mirë”.

“Jam dakord me konceptin e fitores; është e njëjtë për të gjitha ekipet kryesore. E ndjej këtë përgjegjësi, por është një përgjegjësi e mahnitshme. Nuk do ta ndryshoja këtë rol me asnjë tjetër. Dua të jap më të mirën time dhe të transmetoj të gjithë entuziazmin dhe motivimin. Ne duam ta përballojmë çdo lojë në mënyrën më të mirë dhe të konkurrojmë kundër të gjithëve. Kjo është ideja ime sot”, përfundoi trajneri italian. /Telegrafi/