Inaugurohet fidanishtja moderne “Bes-Jet” në fshatin Nepërbisht në Suharekë

Fidanishtja moderne, Fidanishtja Bes-Jet, e inauguruar së fundmi në fshatin Nepërbisht në Komunën e Suharekës, nënkupton një hap të rëndësishëm drejt promovimit të praktikave të qëndrueshme bujqësore dhe rritjes së produktivitetit bujqësor në rajon.

Kjo fidanishte ka përfunduar procesin e modernizimit duke instaluar teknologji moderne për zhvillimin e fidanëve e cila pritet të tranformojë praktikat bujqësore në rajonin e Suharekës, dhe të kontribojë ndjeshëm në zhvillimin e bujqësisë së qëndrueshme.

Besar Kryeziu, pronar i fidanishtes Bes-Jet, tregoi se ndërtimi i fidanishtes kishte filluar vitin e kaluar, teksa falënderoi në veçanti prindërit e tij për kontributin e dhënë.

“Kjo fidanishte ka filluar vitin e kaluar të ndërtohet dhe sot i erdhi fundi dhe fillimi i një fillimi të ri të fidanishtes moderne”, tha ai.

Kryetar i Komunës së Suharekës, Bali Muharremaj tha se Komuna e Suharekës është komuna numër një me zhvillim ekonomik në Kosovë sa i përket numrit të banorëve.

“Ne e kemi arritur buxhetin në bujqësi, çdo vit mbi një milion euro ndajmë, një komunë e vogël jemi, por sot Suhareka krenohet me zhvillim ekonomik, jemi komuna numër një me zhvillim ekonomik në Kosovë”, shtoi tutje kryetari i Suharekës.

Jean Christophe Favre, nga Zyra Zvicerane për Bashkëpunim (SCO), tha se themelimi i fidanishtes Bes-Jet ju ofron fermëve të rajonit qasje më të lehtë në fidane cilësore.

“Inaugurimi i kësaj fidanishteje është shumë i rëndësishëm për zhvillimin e kompanisë por edhe t’i ndihmojë fermerët e këtij rajoni për të pasur qasje më të lehtë në fidane cilësore që ka për tu përkthyer në rritje te produktivitetit dhe rendiment më të mirë të të korrave”, u shpreh ai para të pranishmëve.

Shqiprim Lubishtani, lehtësues i zhvillimit të produktit në Swisscontact, tha se hapja e kësaj fidanishteje është një hap i rëndësishëm për promovimin e bujqësisë.

“Kjo fidanishte është një hap i rëndësishëm përpara në përpjekjet tona të përbashkëta për të promovuar bujqësinë e qëndrueshme dhe për të nxitur rritjen ekonomike në këtë rajon”, u shpreh Lubishtani.

Fidanishtja Bes-Jet ka instaluar sistemin e kontrollit klimatik që siguron kushte optimale të rritjes së findanëve, për shkak të kushteve të kontrolluara, temperaturës dhe lagështisë optimale, pavarësisht kushteve të jashtme.

Përveq kësaj, e ka edhe sistemin e automatizuar të ujitjes BOOM, që është një teknologji moderne e ujitjes së fidanëve që kursen ujë dhe ju ofron fidanëve sasinë e përsosur të ujitjes.

Gjithashtu dhoma e mbirjes së kësaj fidanishteje ju mundëson fidanëve të mbijnë në kohë optimale, me rritje uniforme dhe me përqindje të lartë të mbirjes së farave.

Modernizimi i fidanishteve luan një rol kritik në përmirësimin dhe diversifikimin e bimëve, rritjes e sigurisë së ushqimit dhe në përgjithësi, zhvillimin rural. Modernizimi i fidanishtes Bes-Jet është mundësuar përmes bashkëfinancimit nga biznesi Bes-Jet Sh.P.K, Komunës së Suharekës dhe projektit për Promovimin e Punësimit në Sektorin Privat, PPSE. 

Projekti PPSE ka për qëllim promovimin e praktikave të qëndrueshme në bujqësi, të përmirësojë qasjen në tregje dhe të modernizojë zingjirin e vlerës të ushqimit.  

PPSE është projekt i Agjencisë Zvicerane për Zhvillim dhe Bashkëpunim, dhe implementohet nga Swisscontact dhe Instituti Riinvest.