Të paktën 1,301 njerëz vdiqën gjatë Haxhit – thotë Arabia Saudite

Të paktën 1,301 njerëz vdiqën gjatë Haxhit, thotë Arabia Saudite, kryesisht pelegrinët e paautorizuar që ecnin distanca të gjata në vapë.

Pelegrinazhi i këtij viti u zhvillua gjatë një vale të nxehtit, me temperatura që nganjëherë i kalonin 50C (122F).

Më shumë se tre të katërtat e atyre që vdiqën nuk kishin leje zyrtare për të qenë atje dhe ecnin nën rrezet e diellit direkte pa strehë adekuate, tha agjencia zyrtare saudite e lajmeve SPA.

Disa nga ata që vdiqën ishin të moshuar ose të sëmurë kronikë, shtoi agjencia, shkruajnë mediat e huaja, përcjell Telegrafi.

Ministri i Shëndetësisë, Fahd Al-Jalajel tha se janë bërë përpjekje për të rritur ndërgjegjësimin për rreziqet e stresit të nxehtësisë dhe se si pelegrinët mund ta zbusin këtë.

Objektet shëndetësore trajtuan gati gjysmë milioni pelegrinë, ka treguar ai, dhe disa ishin ende në spital për lodhje nga nxehtësia.

Megjithatë, Arabia Saudite është kritikuar se nuk ka bërë më shumë për ta bërë Haxhin më të sigurt, veçanërisht për pelegrinët e paregjistruar të cilët nuk kanë qasje në objekte të tilla si tendat me ajër të kondicionuar dhe transportin zyrtar të Haxhit.

Temperaturat në Mekë u ngjitën deri në 51.8 gradë Celsius, sipas qendrës kombëtare meteorologjike të Arabisë Saudite.

Haxhi është pelegrinazhi vjetor i myslimanëve në qytetin e shenjtë të Mekës.

Të gjithë myslimanët që janë të aftë fizikisht dhe kanë mundësi financiare duhet ta kryejnë pelegrinazhin të paktën një herë në jetën e tyre.

Rreth 1.8 milion njerëz morën pjesë këtë vit, tha Arabia Saudite. /Telegrafi/