Festivali Anibar publikon Programin Filmik për edicionin e 15-të

Pritja ka mbaruar!

Festivali Ndërkombëtar i Animacionit Anibar më në fund po bën publike përzgjedhjen zyrtare të filmave për edicionin e 15-të. 

Nga një numër prej 1532 filmash nga 77 vende të botës, ekipi i programit ka arritur të përzgjedhë gjithsej 134 filma të animuar, të ndarë në 9 kategori, 6 prej të cilave janë garues. 

Ekipi i programit u përbë nga drejtori artistik i festivalit, Petrit Gora i cili ka përzgjedhur filmat për Garën Ndërkombëtare, Studentore, Ballkanike, Video-Animacioneve Muzikore dhe Panoramës jashtë Garës, Vita Kasapolli e cila ka qenë përgjegjëse për përzgjedhjen e filmave në Garën e Audiencës së Re dhe të Filmave për të Drejtat e Njeriut, dhe Panot Mahmutaj i cili ka ardhur sërish me Programin e kuruar Eksperimental. Ky sigurisht ka qenë një udhëtim argëtues! 

Festivali vazhdon të mahnitet nga filmat që pranojnë në çdo edicion, gjë që e bën punën e tyre një proces të vështirë për të bashkuar të gjitha narrativat, zhanret dhe stilet. Megjithatë ata mendojnë se i kanë mbuluar të gjitha dhe shpresojnë që ju ta shijoni këtë përzgjedhje filmash! 

Festivali pret t’ju shohë në katër kinematë e tij gjatë ditëve të festivalit!

Prej 15 deri me 21 korrik, po takohemi në Pejë, Kosovë për të ndihmuar në ndërtimin e një sistemi të përshtatshëm përmes vetëdijësimit dhe gjithëpërfshirjes.