Një trend i ri me botoks po përhapet! Kirurgët janë kundër “ideve të çmendura” e të rrezikshme

Një trend i ri po përhapet në botën e bukurisë, gjithnjë e më shumë femra kërkojnë injektime botoksi në këmbë!

Ideja se bukuria kërkon sakrificë është hedhur poshtë prej kohësh nga mjekët, nutricionistët dhe instruktorët e fitnesit.

Ushqimi i shëndetshëm, aktiviteti i rregullt fizik dhe pranimi i figurës suaj janë çelësat e vetëbesimit të fortë. Megjithatë, bota e bukurisë dikton rregullat e veta dhe tani po përhapet një trend i ri i quajtur “calf tox”.

Bëhet fjalë për injektimin e botoksit në këmbë për t’i bërë ato më të holla, transmeton Telegrafi.

Vetë procedura nuk është e re, për të është folur dhjetë vjet më parë, por TikTok-u kontribuoi në ringjalljen e trendit.

Ekspertët thonë se problemi është se aftësia e muskujve me Botox për të pompuar gjakun nga këmbët në zemër mund të dëmtohet. Dhe kjo nënkupton jo vetëm probleme për t’u marrë me sport, por edhe një rrezik serioz për shëndetin.

Dhimbja, ënjtja, hematomat dhe reaksionet alergjike janë vetëm disa nga efektet anësore të mundshme.

“Duke injektuar Botox në këmbë, ju do të relaksoni përkohësisht muskujt e tyre duke bllokuar mbaresat nervore. Kjo mund të ndikojë në aktivitetet e përditshme, pra mënyrën se si ecni, vraponi ose kërceni”, tha kirurgu plastik Andrew Peredo për New York Post, duke shtuar se efektet afatgjata janë ende të panjohura.

Lexo po ashtu Çka është botoksi dhe si vepron

“Kur ndryshoni anatominë e shputave dhe këmbëve, mund të shkaktoni një reaksion zinxhiror. Për shembull, kur godet një objekt me gishtin e këmbës, mund të shkaktojë dhimbje në gjunjë, ijë apo shpinë”, shpjegoi ai dhe theksoi se beson se përdorimi i Botox-it në këtë mënyrë nuk duhet të shkaktojë dëmtime të përhershme, pasi muskuli do kthehet në normalitet kur botoksi zhduket. /Telegrafi/