Binjakëzohen Peja dhe Ulqini, Muhaxheri e Nimanbegu nënshkruajnë marrëveshjen

Kryetari i Komunës së Pejës, Gazmend Muhaxheri ka pritur në takim kryetarin e Komunës së Ulqinit, Genci Nimanbegu.

Gjatë takimit kryetari i Komunës së Pejës, Gazmend Muhaxheri dhe kryetari i Komunës së Ulqinit, Genci Nimanbegu kanë nënshkruar marrëveshjen e binjakëzimit midis Komunës së Pejës dhe Komunës së Ulqinit.

“Motivi i këtij takimi dhe kësaj ceremonie është forcimi i lidhjeve dhe bashkëpunimit ndërmjet komunave tona, që të shkëmbejmë përvojat dhe praktikat më të mira në administrim dhe zhvillim lokal, si dhe të promovojmë marrëdhëniet kulturore e ekonomike midis Pejës dhe Ulqinit”, thuhet në njoftim.

Tutje, theksohet se “Peja me natyrën e bukur malore dhe Ulqini me bukuritë bregdetare ofrojnë përvoja të ndryshme të turizmit, që mund të pasurojnë njëra-tjetrën dhe të ndikojnë pozitivisht në zhvillimin ekonomik dhe social të qyteteve tona”.

Në frymën e miqësisë dhe vullnetit të mirë do të bashkëpunojnë për të mirën e përbashkët të komuniteteve të tyre duke i hulumtuar mundësitë për arsim, ekonomi, kulturë, si dhe mundësitë tjera për bashkëpunim.

Ky binjakëzim synon të nxisë zhvillimin e qëndrueshëm dhe të përmirësojë cilësinë e jetës së qytetarëve tonë.

Pas nënshkrimit solemn të marrëveshjes së binjakëzimit, në sallën e Kuvendit Komunal të Pejës, Koordinatori për EU Fondet, Arsllan Hajdinaga ka prezantuar projekt – idenë për fondet IPA, bashkëpunimin përtej kufitar Mali i Zi – Kosovë.

Po ashtu, gjatë ditës Kryetari Muhaxheri dhe Kryetari Nimanbegu kanë vizituar Galerinë e Arteve në Pejë, ku mbrëmë është hapur ekspozita personale e piktorit, Nikollë Nikprelaj “Tinguj zemre”.-thuhet në komunikatën nga Zyra për Informim e Komunës së Pejës./Telegrafi/