“Ermal Krasniqi i duhet Sparta Pragës për garat evropiane” – legjenda çeke Rosicky tregon pse e transferuar yllin e Kosovës

Drejtori sportiv i Sparta Pragës, Tomas Rosicky, emër i njohur në futbollin botëror, ka folur për transferimin e Ermal Krasniqit nga Rapid Bukureshti.

Sulmuesi i krahut shkëlqeu te Rapid Bukureshti, ku shënoi gjashtë gola dhe kishte tre asistime në pranverë, duke bërë që shumë klube të njohura të futen në garë.

Rosicky që ka bërë karrierë në klube si Arsenal dhe Borussia Dortmund, ka treguar pse e kanë transferuar Krasniqin, duke folur edhe për cilësitë e tij.

“Ermalin e sjellim për shkak të tipologjisë së tij. Ai është një lojtar i lëvizshëm, dinamik. Në disa ndeshje, veçanërisht në garat e UEFA-s, ne ndjemë se na mungonte më shumë shpejtësia – dhe Ermal do të na ndihmojë në këtë drejtim”.

Lexo po ashtu Zyrtare: Ermal Krasniqi, lojtar i Sparta Pragës

“Ai është një futbollist që lëviz, sulmues, i mësuar të luajë në disa pozicione në sulm. Ai është gjithashtu i rrezikshëm për kundërshtarët sepse di të shënojë dhe të asistojë gola”, ka thënë Rosicky.

Krasniqi ka bërë karrierë te Ferizaj, Llapi, Feronikeli dhe Ballkani në Kosovë. /Telegrafi/