Virozat dhe gripi i syrit: Sëmundjet virale po prekin të gjitha moshat, shoqërohet me temperaturë

Me ardhjen e verës dhe ngrohjen e temperaturave, jo vetëm që po përjetojmë ditë më të gjata dhe më të nxehta, por gjithashtu po shohim një rritje të rasteve të virozave, të cilat po ndikojnë si të vegjëlit ashtu edhe të rriturit.

Sipas mjekes pediatre Aida Dema Mara, raste të shpeshta të sëmundjeve virale janë vërejtur tashmë prej tre javësh.

“Kemi vënë re raste të prekur nga virozat, të cilat janë të shoqëruara me dhimbje fyti dhe temperaturë të lartë, ndryshe nga virozat e zakonshme që zakonisht zgjasin vetëm tre ditë,” shpjegon Mara.

Në këtë valë të re të sëmundjeve virale, nuk është vetëm temperatura e lartë që shqetëson, por edhe konjunktiviti i syrit, një gjendje e njohur gjithashtu si “gripi i syrit”, që po prek një spektër të gjerë moshash.

Viroza dhe konjunktiviti, sipas Dr. Marës, kanë treguar një përhapje të konsiderueshme.

“Kemi parë shumë raste të konjunktivitit të syrit, i cili është shumë i ngjitshëm – jo vetëm nga fëmija tek fëmija, por edhe ndër të rriturit,” shton ajo.

Mjekët pediatër bëjnë thirrje për kujdes të veçantë gjatë kësaj periudhe, veçanërisht nga prindërit, në lidhje me ushqimin e fëmijëve.

“Ngritja e temperaturave po shoqërohet gjithashtu me shtimin e rasteve të gastroenteritit dhe viroza të tjera që qarkullojnë gjatë sezonit të nxehtë. Prandaj, apeli është që prindërit të jenë të vëmendshëm dhe të marrin masa të duhura për të mbrojtur shëndetin e të vegjëlve në këto ditë sfiduese të verës”.