Lajme Kosovë

Erdogan në takim me Kurtin: Turqia do të vazhdojë të mbështesë Kosovën në çdo fushë

Para 7 muajve

Presidenti i Turqisë, Recep Tayyip Erdogan, në takimin e tij me kryeministrin e Kosovës, Albin Kurti, theksoi se janë fokusuar në rritjen e vëllimit të tregtisë ndërmjet Turqisë dhe Kosovës në mbi një miliard dollarë, e cila momentalisht është afër 750 milionë dollarë.

Presidenca turke ka publikuar një njoftim lidhur me takimin midis liderëve Erdogan dhe Kurti në Kompleksin Presidencial në Ankara, transmeton agjencia turke e lajmeve Anadolu.

Sipas njoftimit, në takim janë trajtuar çështjet si marrëdhëniet midis Turqisë dhe Kosovës, “sulmet e Izraelit në tokat palestineze”, si dhe çështjet rajonale dhe globale.

Presidenti i Turqisë Erdogan në takim ka theksuar se janë fokusuar në rritjen e vëllimit të tregtisë ndërmjet Turqisë dhe Kosovës në mbi një miliard dollarë, e cila momentalisht është afër 750 milionë dollarë, ndërsa ka potencial për të zhvilluar marrëdhëniet në shumë fusha, përfshirë në industrinë e mbrojtjes.

“Erdogan tha se mbështetja e Turqisë ndaj Kosovës do të vazhdojë në çdo fushë, se priten hapa nga Kosova, veçanërisht në luftën kundër terrorizmit dhe se është i mirëseardhur fillimi i zbutjes së tensioneve ndërmjet Kosovës dhe Serbisë, por se është e rëndësishme që të sigurohet progres konkret lidhur me këtë çështje. Presidenti Erdogan theksoi se duhet të rritet presioni ndërkombëtar ndaj Izraelit për të përfunduar masakrat që i kryen në Gaza, të jepet mbështetje ndaj zgjidhjes me dy shtete dhe se Palestina duhet të mbështetet në mënyrë aktive”, thuhet në njoftimin e Presidencës turke.

Today I was welcomed in Ankara by President @RTErdogan. We discussed bilateral relations & new opportunities for economic and defense cooperation. On Monday the first economic forum for businesses from 🇽🇰 and 🇹🇷 will be held, providing a chance to deepen ties & boost investments. pic.twitter.com/RYHvZh43Vv

— Albin Kurti (@albinkurti) May 31, 2024

Për këtë takim ka shkruar në platformën X edhe kryeministri Albin Kurti.

“Sot u prita në Ankara nga Presidenti Erdogan. Diskutuam marrëdhëniet dypalëshe dhe mundësitë e reja për bashkëpunim ekonomik dhe të mbrojtjes. Të hënën do të mbahet forumi i parë ekonomik për bizneset nga Kosova dhe Turqia, duke ofruar një shans për thellimin e lidhjeve dhe nxitjen e investimeve”, ka shkruar Kurti.

Ndërsa nga Zyra e Kryeministrit të Kosovës njoftojnë se Kryeministri Kurti shprehu mirënjohjen e tij dhe të popullit të Kosovës për mbështetjen e vazhdueshme të Turqisë përgjatë gjithë etapave të ndërtimit të shtetit të Kosovës dhe zhvillimit të tij, sikurse shprehu edhe falënderimin për përkrahjen e Turqisë për anëtarësimin e Kosovës në NATO dhe për votën e deputetëve turq në Asamblenë Parlamentare të Këshillit të Evropës më 16 prill të këtij viti dhe qëndrimin e Qeverisë së Turqisë në Komitetin e Ministrave të kësaj organizate.

Ky ishte takimi i dytë dypalësh ndërmjet Kryeministrit Kurti dhe Presidentit Erdogan. Takimi i parë i këtij lloji u zhvillua në Stamboll në shkurt të vitit 2023./Telegrafi/