Një vit kur kryetarët e komunave në veri morën detyrat, LVV: Grupet kriminale serbe bën sulme, por institucionet tona ngadhënjyen

Lëvizja Vetëvendosje përmes një video të publikuar thotë se sot është bërë një vit prej kur kryetarët në katër komunat në veri morën detyrat.

LVV thekson se pavarësisht sulmeve të grupeve të organizuara kriminale me dirigjim nga Beogradi, institucionet e Kosovës ngadhënjyen, transmeton Telegrafi.

“Sot bëhen një vit prej kur kryetarët në katër komunat në veri morën detyrat. Grupe të organizuara kriminale me dirigjim nga Beogradi bën sulme të përditshme ndaj Policisë, gazetarëve e pjesëtarëve të KFOR-it me qëllim pengimin e punës së kryetarëve në këto komuna dhe luftimin e rendit kushtetues të Republikës së Kosovës. Por, institucionet e Republikës të vendosura ngadhënjyen”, thuhet në reagim.

Partia e cila është në pushtet shton tutje se “vendosmëria për kushtetutshmëri, rend dhe ligj triumfoi”.

LVV gjithashtu ka kritikuar edhe analistët, të cilët kishin bërë disa komente në atë kohë.

“Në anën tjetër, asokohe në shumë studio televizive, nga shumë zëra ngjallej frikë, panik e dorëzim. Por, fotografia e sotme në veri të vendit është përgjigja më e mirë për ata zëra”,theksohet në postimin e bërë nga LVV. /Telegrafi/