Inovacion për Qëndrueshmëri: Hackathon-i i ardhshëm në Prizren

Të bëjmë së bashku një të ardhme më të gjelbër!

Nga data 23 deri më 25 maj, në Parkun e Inovacionit dhe Trajnimeve (ITP) Prizren do të organizohet hackathoni i fokusuar në krijimin e zgjidhjeve të qëndrueshme përmes inovacionit digjital. Ky event organizohet nga Free Libre Open Source Software Kosova (FLOSSK) dhe me mbështetje nga IPKO Telecommunications, me qëllim të bashkimit të mendjeve krijuese për të trajtuar sfidat mjedisore.

Fuqizimi i inovatorëve

Hackathon-i fton ekipe për të zhvilluar prototipe që adresojnë çështje kritike të qëndrueshmërisë. Pjesëmarrësit e përzgjedhur do të marrin mbështetje të plotë, duke përfshirë transportin për dhe nga ITP Prizren, akomodimin nga data 23 deri më 25 maj, ushqimin dhe pajisjet e nevojshme si sensorët dhe paisjet Arduino. Pjesëmarrësit duhet të sjellin vetëm laptopët, sendet personale dhe, më e rëndësishmja, idetë e tyre inovative.

Mentorim nga ekspertë

Pjesëmarrësit do të përfitojnë nga udhëzimet e mentorëve me përvojë, duke përfshirë Besfort Guri, ekspert në IoT dhe GIS; Lis Luci, specialist në shkencën e të dhënave dhe sensorë; dhe Enis Hyseni, ekspert i teknologjisë në elektronikë.

Pikat kryesore të eventit

Pjesëmarrësit do të angazhohen në zhvillimin e aplikacioneve të bazuara ne IoT (Internet of Things) që përmirësojnë efikasitetin e burimeve dhe promovojnë qëndrueshmërinë. Eventi do të ofrojë mundësi për përmirësimin e aftësive në kodim, zgjidhjen e problemeve dhe punën në grup përmes sfidave praktike. Gjithashtu, ofron një platformë për rrjetëzim profesional, duke lejuar pjesëmarrësit të lidhen me kolegë, mentorë dhe liderë të industrisë, duke ndërtuar marrëdhënie profesionale të qëndrueshme dhe duke eksploruar mundësi të reja karriere. Përveç kësaj, eventi do të rrisë ndërgjegjësimin për rolin kritik të teknologjisë në mbështetjen e qëndrueshmërisë mjedisore dhe do të kontribuojë me zgjidhje me ndikim për problemet reale.

Shpërblimet për fituesit

Tre fituesit e Hackathon-it do të shpërblehen me çmime, ku vendi i parë fiton €1500, vendi i dytë €800 dhe vendi i tretë €600. Pjesëmarrësit mund të presin një mjedis dinamik të mbushur me punë të palodhur, argëtim dhe rrjetëzim. Deri në fund të eventit, ekipet do të kenë zhvilluar prototipe funksionale të zgjidhjeve të tyre inovative dhe do të kenë fituar përvojë të vlefshme.

Bashkohuni me inovacionin

Ky hackathon është një mundësi unike për të bashkuar idetë inovative me zgjidhjet e zbatueshme që mbështesin një të ardhme të qëndrueshme.

Për më shumë informacione dhe detaje për regjistrim, vizitoni [https://bit.ly/4dFAVnY].

Rreth FLOSSK

Free Libre Open Source Software Kosova (FLOSSK) është e përkushtuar në promovimin e përdorimit të softuerit me burim të hapur, përmirësimin e aftësive digjitale dhe nxitjen e inovacionit në Kosovë.

Rreth IPKO Telecommunications

IPKO Telecommunications është një ofrues lider i shërbimeve të telekomunikacionit në Kosovë, i përkushtuar në avancimin teknologjik dhe mbështetjen e iniciativave të bazuara në komunitet.

Si inovatorë në teknologji dhe komunikim, IPKO ofron një gamë të gjerë shërbimesh që përfshijnë zgjidhje të telefonisë mobile, internetit, televizionit digjital dhe shërbimeve ICT.

IPKO është e dedikuar në ndërtimin e një të ardhme më të mirë përmes përdorimit të teknologjive të reja, për të forcuar marrëdhëniet në komunitet. Përmes mbështetjes së eventeve si ky hackathon, IPKO synon të nxisë një kulturë të inovacionit dhe ndryshimit pozitiv. IPKO beson në fuqizimin e individëve dhe komuniteteve për të krijuar zgjidhje që sjellin ndryshime të qëndrueshme dhe të dobishme, duke hapur rrugë për një Kosovë më të lidhur dhe më të gjelbër.