“Gjysmë viti në ferr”: Protestuesit në Izrael bëjnë thirrje për dorëheqjen e Netanyahut dhe zgjedhje të parakohshme

Protestuesit dolën sërish në rrugët e Tel Avivit, Caesarea-s dhe Haifa-s të shtunën, duke kërkuar dorëheqjen e kryeministrit izraelit Benjamin Netanyahu dhe zgjedhje të parakohshme.

Demonstruesit kërkuan gjithashtu lirimin e të gjithë pengjeve izraelitë të mbajtur në Gaza, përcjell Telegrafi.

Shumë njerëz valëvitën flamuj izraelitë dhe mbanin tabela me imazhet e pengjeve, duke i bërë thirrje qeverisë t’i sillte ata të gjallë në shtëpi.

Në Tel Aviv, protestuesit u dëgjuan duke brohoritur: “Ne nuk kemi frikë; ju e shkatërruat vendin dhe ne do ta rregullojmë. Ne duam që ata (pengjet) të kthehen të gjallë dhe jo në arkivole”.

Lexo po ashtu Ekipi i OBSH-së arrin në spitalin e shkatërruar të Gazës - sjellin pamje që tregojnë shkatërrimin atje

Disa mbanin pankarta që i kërkonin qeverisë izraelite të bënte më shumë për t’i sjellë ata në shtëpi, ndërsa të tjerë mbanin pankarta që shkruanin: “Gjysmë viti në ferr”.

Protestuesit e tjerë u panë nga një ekip i CNN duke mbajtur flamuj dhe pankarta, me një shkrim: “Qeveria që shkatërroi vendin dhe copëtoi kombin”.

Një tjetër pankartë bënte thirrje për “ndarjen e fesë dhe shtetit”, dhe njëra thoshte se “Netanyahu është i rrezikshëm për Izraelin”.

Protestuesit në Haifa e quajtën qeverinë një dështim, duke thënë se Netanyahu është “fajtor, fajtor, fajtor”.

“Zgjedhje tani!”, shkruante në një pankartë të mbajtur nga një protestues. /Telegrafi/