Shoqatat civile pretendojnë se rekomandimi i OSBE-së për listat e pavarura po keqinterpretohet

Shoqatat civile kundërshtojnë pretendimet e KSHZ-së se rritja e pragut të nënshkrimeve të nevojshme për listat e varura dhe kandidaturat në 1 për qind të votuesve të regjistruar ishte pjesë e rekomandimeve të OSBE/ODIHR.

Në një deklaratë për Kanal 5, Iniciativa Qytetare “Qytet i gjelbër human” thekson se sipas tyre rekomandimet e OSBE-së janë keqinterpretuar. Ata pretendojnë se Raporti i OSBE-së askund nuk kërkonte rritje të numrit të nënshkrimeve të mbledhura në 1 për qind të votuesve, por rekomandohej që të mos kalonte ai prag. Ata theksojnë se me ndryshime të tilla, në vend të 1000 të deritanishme, do të duhet të sigurojnë të paktën dy ose trefish më shumë nënshkrime për të hyrë në garën zgjedhore.

Sqarimi nga KSHZ-ja, pas një sërë reagimesh të aktivistëve civilë se ndryshimet e reja në Kodin Zgjedhor në mënyrë tinëzare përjashtojnë kandidatët e pavarur nga gara duke rritur pragun, ishte se ai u rrit në bazë të rekomandimit të OSBE-së – që numri i nënshkrimeve të jetë proporcional me numrin e votuesve të regjistruar, në mënyrë që të sigurohen mundësi të barabarta për të gjithë pjesëmarrësit në zgjedhje.

Pas interpretimeve të ndryshme të rekomandimeve, “Qytet i gjelbër human” thotë se nuk do të devijojnë nga kërkesat e tyre për heqjen e pragut të ngritur për mbledhjen e nënshkrimeve dhe se për këtë tashmë kanë njoftuar ndërkombëtarët dhe OSBE-në. E nëse palët dhe institucionet kompetente, të cilat realisht nuk janë konsultuar para miratimit të ndryshimeve, heshtin ndaj ankesave të tyre, paralajmërojnë organizimin e protestave.

Ndryshimet në kodin zgjedhor, të cilat i referohen ndryshimit të kushteve për kandidimin e listave të pavarura dhe kandidatëve, nuk do të vlejnë për zgjedhjet e ardhshme parlamentare, por do të fillojnë të zbatohen nga zgjedhjet e ardhshme vendore, të cilat duhet të mbahen në vijim.