Dhuna në familje rritet, qytetarët nuk u besojnë institucioneve

Gjendja e rënduar ekonomike si dhe ndikimi i rrjeteve sociale gjithnjë po shkatërron familjet. Problemet sociale sa shkojnë e rëndohen tek shoqëria jonë dhe kjo pastaj degjeneron në dhunë familjare. Kështu thotë profesori universitar Bashkim Selmani, i cili gjatë periudhës së kaluar ka realizuar një hulumtim me studentët e fakultetit juridik të Universitetit të Tetovës.

“Tek 62 për qind e meshkujve është konstatuar se çdo fjali e fillojnë dhe e mbarojnë me sharje dhe ofendime për nuk respektohet kodeksi etik, ndërsa tek gjinia femërore ata edhe kur janë fajtore kërkojnë falje vetëm e vetëm të anashkalohet një rrezik që ndodh brenda një familje”, thotë Bashkim Selmani, profesor universitar.

Ndërkaq, ende mbetet i vogël numri i denoncimeve të rasteve të dhunës në familje. Kjo ndodh sepse qytetarët nuk u besojnë institucioneve se do të dënojnë dhunuesin.

“Fatkeqësisht mbi 63 për qind e të anketuarve nuk u besojnë institucioneve. Këtë e dëshmojmë edhe me të dhëna sepse nga 163 raste të dhunës në familje që janë denoncuar në rajonin e Pollogut, ku nuk ka asnjë shqiptim të dënimit për kryerësin e dhunës në familje dhe është shumë e dëmshme sepse ka raste kur edhe organet gjyqësore kanë vendosur në favor të dhunuesit”, deklaroi Selmani. Ndërkohë, sa i përket rrjeteve sociale, prindërit edhe pse u blejnë celularë fëmijëve rreth 20 për qind nuk i lejojnë t’i përdorin.

“Këtu edhe lindin zënkat, ndërsa zënkat mes çifteve lindin pasi që gjithmonë gjinia femërore pretendon për të kontrolluar celularin për mesazhet që i vijnë burrit. Pra, edhe raportet bashkëshortore edhe raportet prind-fëmijë është shumë i rrezikuar”, nënvizoi ai.

Në ndërkohë, ai ka përmendur edhe përdorimin e celularëve nëpër shkolla, ku ka theksuar se ka shumë raste kur nxënësit xhirojnë bashkëmoshatarët e tyre apo edhe profesorët dhe më pastaj vjen deri tek bullizimi.

“Këtu kemi gjetur mbi 24 raste, të cilët akoma nuk janë denoncuar mirëpo akoma janë në rrezik e sipër. Edhe pse janë denoncuar tek organet përkatëse, këta të fundit nuk marrin masa. Prandaj edhe sipas anketës sonë del se besueshmëria në institucione është shumë e vogël. Nga 138 anketues, ose 69 për qind nuk u besojnë institucioneve. Këtë ata e kanë dëshmuar se edhe kur i kanë denoncuar rastet e dhunës nuk është ndërmarrë asgjë”, sqaroi profesor Bashkim Selmani. Kjo është theksuar gjatë një seance të improvizuar me studentët e fakultetit juridik që u mbajt në Universitetin e Tetovës, ndërsa tema e kësaj seanca ishte pikërisht dhuna në familje.