Lajme Kosovë

Diplomaci e ‘tensionuar’, analistët kërkojnë reflektim të Qeverisë Kurti pas deklaratave të O’Brien

Ndihmëssekretari amerikan i Shtetit për Evropën dhe Euroazinë, James O’Brien, ka thënë se Shtetet e Bashkuara mund të mos e trajtojnë Kosovën si partnere, nëse ajo merr vendime pa u konsultuar me të, pas vendimit për ndalimin e dinarit.

“Unë nuk bëj kërcënime të vagëta publikisht. Unë do të thosha, nëse ne nuk trajtohemi si partnerë, edhe ne nuk do ta trajtojmë qeverinë e Kosovës si partnere”, u shpreh O’Brein.

E një deklaratë e tillë po shihet si shumë e ashpër nga analistët dhe njohësit e çështjeve politike në vend.

Analisti Imer Mushkolaj në një prononcim për Telegrafin ka thënë se nuk është hera e parë që deklarata të tilla nuk merren parasysh nga Qeveria e Kosovës.

“Nuk është hera e parë që deklaratat e tilla të SHBA-ve nuk merren parasysh nga Qeveria e Kosovës. Është shqetësuese sesi kryeministri Albin Kurti nuk po arrin t’i bind partnerët ndërkombëtarë për vendimet që merr”, tha Mushkolaj.

Mushkolaj më tej shtoi se veprimet që ndërmerren nga ana e qeverisë duhet të analizohen mirë.

“Për ta është shumë i rëndësishëm stabiliteti i vendit, andaj çdo vendim që ka potencial për ta përkeqësuar situatën e sigurisë duhet të analizohet mirë. Se a do të futen në krizë raportet me SHBA varet nga bashkëpunimi i Kurtit, por mesazhi amerikan është i qartë”, theksoi Mushkolaj.

Ndërkaq profesori i shkencave politike, Dritëro Arifi, tha se nga deklarata e sekretarit James O’Brien, lënë të nënkuptojë shumë gjëra por dy janë të rëndësishme.

“E para: që nga ardhja e z.Kurti në pushtet kemi pasur një krizë alarmante të raporteve mes Kosovës dhe SHBA-ve, gjithmonë ka ekzistuar kjo kriza e tensionimeve të raporteve. E dyta: tash jemi në gjendje kritike, pra Qeveria e Kosovës pas kësaj deklarate publike është nën tehun e gijotinës dhe çdo veprim i gabueshëm mund të ketë prerje”, tha Arifi në një prononcim për Telegrafin.

Ai më tej tha se fjala publike e Qeverisë amerikane që mund ta ndërprejmë partneritetin nëse nuk trajtohemi si të tillë, është sepse në kanalet diplomatike bilaterale, Qeveria e Kosovës nuk i ka kuptuar apo nuk ka dashur t’i kuptoj sugjerimet e SHBA-ve.

“Kur jepet një deklaratë e tillë publike është sepse kanë dështuar negociatat diplomatike mes Kosovës dhe SHBA-së, prandaj gjendja është shumë kritike. Nëse këto tri vite Qeveria e Kosovës nuk ka mësuar asgjë nga ajo sesi duhet të bashkëpunoj me partnerët dhe sa duhet të jetë e sinqertë me disa partnerë besoj që pasojat do ti pësojmë të gjithë”, tha Arifi.

Një rregullore e Bankës Qendrore të Kosovës – e cila përcakton që euroja të jetë valuta e vetme që mund të përdoret për pagesa me para të gatshme në gjithë vendin – hyri në fuqi më 1 shkurt, pavarësisht thirrjeve të bashkësisë ndërkombëtare për shtyrjen e zbatimit të saj dhe kundërshtimit nga serbët e Kosovës.

Të hënën, BQK-ja njoftoi se faza e tranzicionit të zbatimit të rregullores së saj do të zgjasë deri në tre muaj, ndërsa kryeministri i Kosovës, Albin Kurti, tha se Kosova nuk do të heqë dorë nga vendimi për ndalimin e dinarit për pagesa me para të gatshme, por se ai po i respekton kërkesat e bashkësisë ndërkombëtare për këtë çështje. /Telegrafi/