Normalizimi i marrëdhënieve Kosovë – Serbi, Guerot: Nuk shoh zgjidhje më të mirë sesa plani franko-gjerman

Ambasadori i Francës në Kosovë, Olivier Guerot nuk sheh ndonjë zgjidhje më të mirë për normalizimin e marrëdhënieve Kosovë – Serbi, sesa plani franko-gjerman.

Ambasadori francez ka theksuar se ky plan ka avantazhe për të dyja vendet, teksa thotë se ky propozim siguron gjërat për Kosovën që i ka kërkuar me vite.

“Nuk shoh ndonjë zgjidhje tjetër këtu përpos planit franko-gjerman. Është një zgjidhje që është propozuar në shtator 2022 dhe është diskutuar dhe përfundimisht ka dalë në shkurt 2023 dhe siç tha Rohde [ambasadori i Gjermanisë] ka dhënë shumë avantazhe për Kosovën, relacione më të mira, integritetin territorial, anëtarësimin në organizata ndërkombëtare dhe gjëra të tjera, për të cilat ka luftuar Kosova ndër vite”, ka thënë Guerot.

Lexo po ashtu Ambasadori francez: Kosova ka shumë për të fituar nga dialogu

Ai ka përsëritur kërkesën e vendeve të QUINT-it duke thënë se edhe Franca pret nga Kosova të kryejë detyrat e saj dhe të procedojë tutje me Asociacionin e komunave me shumicë serbe.

“Jo vetëm që unë mendoj që është një draft i mirë, mendoj se edhe qeveria pajtohet, sepse edhe kryeministri është shprehur i gatshëm të pranojë nëse është brenda pakos. Nuk ka propozuar ndonjë ndryshim. Nuk mendoj se është keq drafti. Ky dokument nuk jep fuqi shtesë komunave ashtu shkruhet dhe ashtu ka të bëjë me përmbushjen e fuqive të tyre, të cilat i posedojnë. Është plotësisht i ligjshëm. Nga Kosova presim Asociacionin, dhe është artikulli tjetër që flet për Kishën Ortodokse Serbe, duhet të procedojmë tutje për interesin e Kosovës”, ka thënë Guerot, për RTV Dukagjini.

Edhe ambasadori i Gjermanisë në Kosovë, Jorn Rohde ka thënë se Asociacioni i komunave me shumicë serbe është obligim i Kosovës dhe si i tillë duhet të implementohet.

“Është obligim i Kosovës nga Parlamenti. Kosova dhe Serbia janë dakorduar që të implementojnë marrëveshjen e Brukselit dhe kjo është mënyra për të arritur normalizimin e marrëdhënieve, sepse i lexoni marrëveshjet është një gjë që Kosova duhet ta zbatojë Asociacionin dhe hapat e tjerë duhet të përcillen nga Serbia”, ka deklaruar Rohde. /Dukagjini/