Faktorët pozitivë makroekonomikë mbajnë në pozita të forta lekun

Tregu i këmbimeve valutore këtë fillim viti po mbështet pritshmërinë për mbiçmim të mëtejshëm të monedhës vendase në Shqipëri.

Sipas Bankës së Shqipërisë, forcimi i lekut rrjedh nga një ndërthurje e faktorëve pozitivë makroekonomikë. Më i rëndësishmi, deficiti i llogarisë korente është transformuar në suficit për herë të parë në histori, duke tejkaluar 354 milionë euro në tremujorin e tretë 2023, krahasuar me një deficit prej 145 milionë euro një vit më parë. Kjo kthesë i atribuohet kryesisht rritjes së fortë të sektorit të turizmit, ku të ardhurat u rritën me 50% gjatë nëntë muajve të parë të 2023.

Rritja e turizmit shkon përtej sezonit tradicional veror dhe në 2023 u regjistruan mbi 10 milionë turistëve të huaj, ndërsa shifrat e prenotimeve janë pozitive edhe për tremujorin e parë 2024.

Për më tepër, investimet e huaja direkte dhe remitancat mbeten në cikël rritës, duke regjistruar norma rritjeje vjetore dyshifrore. Këto prurje ofrojnë mbështetje të fortë për Lekun, duke plotësuar fluksin hyrës në Euro të udhëhequr nga turizmi.

Ekspertët e Bankës së Shqipërisë, parashikojnë që euro do të luhatet pranë nivelit të 103.1 lekëve në fund të tremujorit të parë të vitit 2024, duke reflektuar ofertën e qëndrueshme në euro nga sektori dinamik i turizmit.

Pas një mbiçmimi me 9.1% gjatë vitit 2023, leku shqiptar ka shfaqur stabilitet në dy javët e para të 2024. Ndërsa është vënë re një zhvlerësim i lehtë nga nivelet që arriti në muajin dhjetor, faktorët themelorë sugjerojnë një vazhdimësi të tendencës mbiçmuese të monedhës vendase. /Telegrafi/