NËSE DUAM

Poezi nga: Mahmoud Darwish
Përktheu: Elmaz Fida

Do të jemi popull,
nëse duam,
atëherë kur të ndërgjegjësohemi se nuk jemi engjëj,
dhe se e liga nuk është vetëm tipar i të tjerëve.

Do të jemi popull,
kur të themi lutje falënderimi për atdheun e shenjtë,
sa herë që i varfëri
gjen ç’të hajë për darkë …

Do të jemi popull,
atëherë kur ta shajmë vezirin
dhe vetë sulltanin,
pa frikë nga pasojat.

Do të jemi popull
kur poeti të shkruajë një poezi erotike
mbi barkun e një valltareje.

Do të jemi popull
kur të harrojmë çfarë na dikton farefisi …
dhe kur individi të lartësohet mbi vogëlsirat.

Do të jemi popull kur shkrimtari të shohë yjet dhe të thotë:
Atdheu ynë qëndron më lart dhe është më i bukur!

Do të jemi popull
kur policia morale të mbrojë një prostitutë
dhe një kurorëshkelëse nga dhuna në rrugë!

Do të jemi popull kur qytetari palestinez të mos brohorasë për flamurin e tij vetëm në fushën e blertë të futbollit,
në konkurset e bukurisë dhe ditën e Nakbas.

Do të jemi popull,
nëse duam,
vetëm kur t’i lejohet këngëtarit të recitojë pasazhet e kaptinës “Al Rrahman” në një ceremoni martese të përzier.

Do të jemi popull atëherë kur të respektojmë të drejtën
dhe atëherë kur të respektojmë edhe të gabuarën!