Osmani e Cramon bisedojnë për zhvillimet e fundit në Kosovë

Presidentja Vjosa Osmani priti sot në takim Raportuesen e Parlamentit Evropian për Kosovë, Viola von Cramon, me të cilën ka diskutuar për zhvillimet më të fundit në vend me fokus të veçantë në fushën e sigurisë, si dhe punën e institucioneve të Kosovës për sa i përket rrugëtimit të integrimit në BE.

Gjatë takimit me raportuesen Cramon presidentja Osmani ka folur për rëndësinë që BE-ja të lëvizë përpara në raport me Kosovën përmes dhënies së statusit të vendi kandidat.

“Po ashtu, Presidentja Osmani potencoi edhe njëherë rëndësinë e largimit të masave të BE-së, të cilat janë ende në fuqi, duke ritheksuar padrejtësinë e këtij vendimi si dhe disbalancin të cilin e krijojnë ato në pozicionimin e palëve në dialog. Ndërlidhur me këtë çështje, Presidentja Osmani konfirmoi se Kosova mbetet palë e përkushtuar për zbatimin e plotë të marrëveshjeve”, thuhet në njoftimin e Presidencës nga takimi.

Në takim u diskutua po ashtu për faktin që ky do të jetë një vit elektoral në nivel të Bashkimit Evropian, me ç’rast u fol për implikimet potenciale të rezultateve të këtyre zgjedhjeve në vendin tonë, në rajon dhe përtej, thuhet në njoftim.

Raportuesja Viola von Cramon ka zhvillua sonte takim edhe me kryeparlamentarin Galauk Konjufca, krerët e dy partive opozitare, Lumir Abdixhikun (LDK) dhe Memli Krasniqin (PDK) si dhe me kryetarin e Prishtinës, Përparim Rama. /Telegrafi/