Largimi nga Teatri i Preshevës si e vetmja aktore shqiptare – si një vit sfidash u shndërrua në triumf për Egzona Salihun

Ndërsa ka përfunduar 2023, aktorja Egzona Salihu, është rikthyer pas për të reflektuar mbi atë që ishte viti i saj i mbushur me sfida e njëherësh edhe me shumë suksese.

Largimi nga Teatri i Preshevës si e vetmja aktore shqiptare shkaktoi një rrëmujë të madhe në media e rrjete sociale, duke sjellë kështu përplasje mendimesh e polemika të shumta.

Megjithëse kjo situatë ishte e vështirë dhe shpesh herë stresuese për të, një gjë që e shtyu të vazhdoj përpara ka qenë: mbështetja e palëkundur që mori nga kolegët dhe nga një komunitet që zgjodhi të mbështeste artin dhe të vërtetën.

Në intervistën për Telegrafin, ajo zbuloi edhe planet për vitin e ri si dhe shumë të pathëna tjera.

Lexo po ashtu Aktorja shqiptare, Egzona Salihu largohet nga puna në Teatrin e Preshevës

Intervista e plotë:

Telegrafi: Ke qenë një emër shumë i komentuar në rrjetet sociale, si e përkufizon vitin që lamë pas?

Egzona Salihu: Vitin që po e lëmë pas mund të them se ishte një vit sfidues, por edhe i frytshëm për mua si aktore. Është e vërtetë që isha e komentuar në media dhe rrjete sociale, për një arsye që tashmë dihet – përjashtimi nga puna në teatrin ku kam ëndërruar të ndërtoj karrierën time dhe t’i jap më të mirën publikut tim dhe vendasve të mi. Megjithatë, përkundër këtyre ngjarjeve, më e rëndësishmja është se kjo aspak nuk më zbeh motivin që të punoj, ndoshta edhe më fort, në mënyrë që të tregoj edhe karakterin e një gruaje të fortë. Si përfundim, këtë vit po e mbyll me shumë suksese, me shumë projekte të realizuara, me pjesëmarrje në festivale, si dhe me çmimin ‘Aktorja më e mirë’.

Telegrafi: Egzona Salihu, një aktore që u përfol jashtëzakonisht shumë pas largimit nga Teatri i Preshevës dhe akuzat që ke shfaqur në rrjete sociale, si u prit ky reagim i juaji?

Egzona Salihu: Është vërtetë që largimi im nga puna është përfolur jashtëzakonisht shumë dhe ka bërë shumë zhurmë në media. Natyrisht, kam marrë si një formë mbështetjeje këtë gjë, edhe pse ishte një situatë e vështirë dhe stresuese. Por, mbështetja e kolegëve dhe e medias më ka ndihmuar shumë. Për këtë arsye, u jam shumë mirënjohëse të gjithë atyre që më kanë mbështetur në një formë apo tjetër, dhe u them ‘Faleminderit’ nga zemra, duke qenë gjithmonë mirënjohëse.

Telegrafi: More mbështetje të madhe nga e gjithë ajo bujë që u shkaktua, mendon se të ndikoi për të mirë?

Egzona Salihu: Patjetër që po, sepse e ceka edhe më lart, mbi të gjitha mbështetja morale ka rëndësi. Mendoj se në këto raste mund të kuptosh se sa është vlera apo pesha jote kundrejt të tjerëve.

Telegrafi: Cilat janë disa nga momentet që do t’i ndash nga viti i kaluar?

Egzona Salihu: Që nga viti i kaluar kam pasur fatin të ndaj momentet e veçanta të festivaleve, të cilat për ne aktorët janë shumë të rëndësishme. Pjesëmarrja, e aq më tepër kur juria të vlerëson me çmimin “Aktorja më e mirë” në festivalin Mitrovica Fest në Mitrovicë, është diçka e veçantë. Atje mora pjesë me Teatrin e Kumanovës në shfaqjen “Fluturimi mbi teatrin shqiptar”.
Gjithashtu, në shfaqjen e monodramës “Grua Gur”, pata rastin të përcjell një mesazh shumë domethënës tek gratë dhe mora shumë përkrahje dhe vlerësime. Sepse, për ne aktorët, duartrokitjet janë ndoshta përgjigjja më e sinqertë. Kjo gjë mua nuk më ka munguar asnjëherë.

Telegrafi: Përveç kësaj pjese, çfarë ke mësuar nga viti 2023? Çfarë ishte më e rëndësishme për ty?

Egzona Salihu: Që nga viti 2023, kam mësuar edhe më shumë të mos dorëzohem kurrë në arritjen e qëllimeve dhe ëndrrave të mia, sidomos në besimin se “Çdo e mirë ka një të keq dhe çdo e keq ka një të mirë”. Këto përvoja më kanë bërë edhe më të fortë sesa isha më parë.

Telegrafi: Të kanë kontaktuar pas largimit nga Teatri i Preshevës, ke pasur ndonjë kontakt me ta? Si qëndron e vërteta?

Egzona Salihu: Nga Teatri i Preshevës nuk më kanë kontaktuar. E vërteta qëndron që shumë shpejt do të fillojnë seancat gjyqësore, dhe unë shpresoj që drejtësia të triumfojë.

Telegrafi: Me çfarë projekte të tjera je marrë, kë veçon më shumë?

Egzona Salihu: Këtë vit kam pasur tre premiera dhe një projekt në Gjilan, i cili ka qenë “Edukim në Teatër”, program që është bërë me fëmijët e shkollave fillore në Komunën e Gjilanit, një përvojë shumë e mirë puna me fëmijë. Gjithashtu, në fund të vitit kam realizuar për herë të parë një stand-up komedi në festivalin e Stand-Up Komedisë në Gjilan. Ndërkohë, kam pasur edhe pjesëmarrje në projekte të tjera me karakter artistik.

Telegrafi: Cilat janë planet e juaja dhe çfarë konkretisht presim në këtë Vit të Ri?

Egzona Salihu: Planet e mia për vitin e ardhshëm janë të realizoj disa projekte, të cilat janë planifikuar të zbatohen në vitin 2024, dhe gjithashtu një projekt i cili është mbështetur nga Ministria e Kulturës në Kosovë. Ky projekt do të realizohet në Preshevë, Bujanoc dhe Medvegjë. Besoj se edhe ky vit nuk do të jetë pa angazhime, dhe kjo patjetër do të shihet në të ardhmen.

Telegrafi: Sa është e vështirë të jesh aktore në trojet shqiptare?

Egzona Salihu: Nuk mund të them se është e vështirë, por as nuk është e lehtë kur kemi të bëjmë me një popull që ka paragjykime. Megjithatë, kjo nuk duhet të jetë një pengesë që të na ndalë, dhe pikërisht kjo është këshilla që do t’ua jepja të tjerëve, sidomos vajzave të reja që dëshirojnë të merren me këtë profesion: të ndjekin ëndrrën e tyre. Sepse këto vështirësi dhe sfida gjithmonë të bëjnë më të fortë drejt realizimit të qëllimeve!

Telegrafi: Dhe në fund një mesazh që do e përcillje për 2024 për të gjithë lexuesit e portalit Telegrafi?

Egzona Salihu: Uroj që viti 2024 të jetë sa më i mirë për të gjithë, fillimisht paqe dhe shëndet e më pas pse jo edhe dashuri…Faleminderit shumë juve për hapësirën mediale, kënaqësi për mua. /Telegrafi/