Bora vështirëson qarkullimin në rrugët e Kosovës, policia paralajmëron se gjatë natës mund të ketë edhe akull

Policia e Kosovës ka apeluar te qytetarët për kujdes të shtuar në trafik, pas reshjeve të dendura të borës që kanë nisur gjatë natës së mbrëmshme e kanë vazhduar edhe sot.

Nga policia kanë bërë të ditur se qarkullimi nëpër rrugë është vështirësuar, teksa është përmendur se qysh para dy javësh është kërkuar që drejtuesit e  automjeteve të kenë pajisje dimërore në veturat e tyre.

Lexo po ashtu Rrugët me borë, reagon Daut Haradinaj: Qeveritarë, dilni shihni si është gjendja, me kilometra kolonë

“Tani, duke qenë se bora e parë ka filluar të bije, në rrugë ka borë e gjatë natës për shkak të temperaturave të ulëta mund të ketë edhe akull. Kërkohet kujdes i shtuar nga të gjithë pjesëmarrësit në trafik me theks të veçantë drejtuesit e automjeteve”, thuhet në komunikatën për media.

Ndërkohë, qytetarët në vazhdimësi po raportojnë se gjendja e rrugëve nuk është mirë dhe kanë bërë thirrje te autoritetet që intervenojnë për t’i pastruar ato.

Nga pamjet e publikuara në rrjetet sociale shihet se për shkak të borës, qarkullimi është vështirësuar në disa rrugë e madje edhe në dy autostradat “Abën Xhaferi” dhe “Ibrahim Rugova”, si dhe në magjistralen Prishtinë-Ferizaj.

Pavarësisht këtyre raportime, Qendra Kombëtare e Menaxhimit Kufitar ka deklaruar gjatë ditës se pavarësisht borës që ka rënë, të gjitha rrugët në pikat kufitare janë të kalueshme.

Sipas të dhënave të publikuar nga kjo qendër, magjistralet që shpien në kufi, janë të kalueshme, nuk raportohet për borë, akull, mjegull apo rrëshqitje dheu.

Edhe zëvendësministri i Infrastrukturës, Hysen Durmishi, ka thënë se të gjitha rrugët që mirëmbahen nga ministria janë të kalueshme.

Lexo po ashtu Durmishi: Rrugët që mirëmbahen nga ministria janë të kalueshme, shoferët të mos dalin pa pajisjet e obligueshme për sezonin dimëror

Durmishi ka pohuar se që nga orët e hershme të mëngjesit janë në terren, transmeton Telegrafi.

“Me 19 kontrata aktive të mirëmbajtjes që i kemi në gjithë territorin e Kosovës, që nga orët e hershme të mëngjesit jemi në teren. Aktualisht të gjitha rrugët që mirëmbahen nga ministria janë të kalueshme. Kërkojmë nga të gjithë pjesëmarrësit në komunikacion që të lëvizin me kujdes duke ju përshtatur kushteve të rrugëve, dhe të mos dalin në rrugë pa pajisjet e obligueshme për sezonin e dimrit”, ka theksuar Durmishi.

E për shkak të borës e shoqëruar me erëra, janë shkaktuar disa dëme, kryesisht në shtylla dhe në përçues elektrikë duke bërë kështu që të ketë probleme me furnizim të rregullt me energji elektrike.

KEDS ka njoftuar se distriktet më të prekura janë Ferizaj, Prishtina, Mitrovica dhe Prizreni.

KEDS kërkon mirëkuptim nga konsumatorët dhe i siguron që në një afat sa më optimal do të rikthehet furnizimi i rregullt me energji elektrike”, thuhet në njoftim. /Telegrafi/