Deputetja Ilire Dauti: Disa kërkesa për nënshtetësi nuk janë shqyrtuar 30 vite

Dispozita kalimtare në ligjin për shtetësi me të cilën u hapet rruga për pajisje me dokument të shtetësisë personave që kanë jetuar në shtet para pavarësisë skadon në gusht të vitit të ardhshëm, ndërkohë sirtarët e institucioneve janë plot me kërkesa të tjera në pritje.

Deputetja e Aleancës për Shqiptarët Ilire Dauti, e cila ndjek nga afër disa raste, thotë se më shumë se dy vite nga miratimi i ligjit, rezultatet e arritura janë të kënaqshme por pengesë vazhdon të jetë mentaliteti burokratik.

“Është një cikël i krijuar me një mendësi të tillë të mbrapsht që mendohet se shqiptari mund të presë pafundësisht për një dokument elementar dhe kjo është e papranueshme”, u shpreh Ilire Dauti, Aleanca për Shqiptarët.

Dauti në intervistë për Alsat nuk fajësoi drejtpërdrejtë as Agjencinë për Siguri Kombëtare dhe as Ministrinë e Punëve të Brendshme, për pengesat.

“Në qoftë se vërtetohet se ministri është arsyeja që disa prej personave nuk do të mund t’i marrin shtetësitë, nuk ka asnjë problem për të ngritur edhe interpelancë por që nuk është ky informacioni që më vjen mua nga bashkëbisedimi me qytetarët të cilët ka raste që 30 vite nuk është shqyrtuar aspak rasti i dikujt”, thotë Ilire Dauti, Aleanca për Shqiptarët.

Ligji për shtetësi u miratua pas presionit të opozitës së atëhershme Aleanca për Shqiptarët dhe Alternativa në vitin 2021 dhe pritej të zgjidhë problemin e personave pa shtetësi të cilit kishin jetuar në vend që para pavarësisë por nuk gëzonin përfitimet si shtetasit e tjerë. Partitë në pushtet në atë kohë besonin se janë diku 2500-3000 persona pa shtetësi. Shifra të sakta nuk janë dhënë asnjëherë.

Pengesa më e madhe ka qenë ish Drejtoria për Siguri dhe Kundërzbulim, tashmë Agjencia për Siguri Kombëtare e cila nuk jepte përgjigje me vite, ose i cilësonte këto persona si të rrezikshëm për shtetin. Ndryshimet ligjore të para dy viteve mundësojnë që Ministria e Punëve të Brendshme të marrë vendim vetë për kërkesat për shtetësi, nëse Agjencia për Siguri Kombëtare nuk përgjigjet në afat prej gjashtë muajsh./Alsat/