Volkhart V2 Sagitta nga viti 1947: Më i shpejtë se një plumb dhe më aerodinamik se një Golf 7

Në botën e madhe të veturave, ka vetura të rralla dhe në të njëjtën kohë të zgjuara të një periudhe të caktuar, për të cilat nuk flitet shumë. Ju sjellim historinë e një klasike të harruar nga vitet 40 të shekullit të kaluar.

Vitet 1940 mbahen mend më së miri për Luftën e Dytë Botërore, e cila detyroi shumë prodhues veturash të kalonin përkohësisht nga prodhimi i veturave në montimin e pajisjeve ushtarake, të tilla si tanke dhe bombardues.

jo temë duket të jetë një temë tabu kur bëhet fjalë për veturat gjermane, veçanërisht një si Volkhart V2 Sagitta e errët e vitit 1947. Ky model kishte disa zgjidhje revolucionare të projektimit që janë magjepsëse, duke marrë parasysh kohën kur u krijua, përcjell Telegrafi.

Sagitta – Shigjeta në greqisht

Vetura në fakt mori emrin e Kurt C. Volkhart – një inxhinier dhe projektues i ideve inovative, i cili lindi me idenë e krijimit të kësaj veture të “lëngshme” dhe u përfshi gjithashtu në veturat e Opel-it me “raketa” RAK1 dhe RAK2 nga viti 1928. Qëllimi ishte për të bërë një veturë të shpejtë që do të shërbente si një mjet korrier i forcave ajrore gjermane – Luftwaffe. Vetura duhej të ishte e vogël, e lehtë, e lirë, por edhe e thjeshtë dhe e besueshme.

Në të vërtetë nuk kishte alternativë tjetër përveç përdorimit të shasisë dhe sistemit të lëvizjes së Buba-s (Kdf Wagen). Zhvillimi filloi rreth vitit 1942, por projekti u realizua vetëm në vitin 1947. Vetura u emërua V2 Sagitta, Sagitta është fjala greke për shigjetën, një emër shumë i përshtatshëm, duke pasur parasysh formën dhe shpejtësinë e veturës.

Motor identik si tek Beetle

Edhe në fillim të jetës së tij, VW Beetle u përdor si bazë për automjete më të orientuara nga performanca. Volkhart V2 Sagitta ishte një nga veturat e para të bazuara në Beetle të lirë. Për të qenë më të saktë, V2 u bazua në Kdf Wagen Type 60 – modeli që ishte versioni i parë i Beetle, i cili u prodhua midis 1937 dhe 1944 në vetëm 60 shembuj. Për shkak të kësaj, sot Volkhart shpesh përmendet si Kdf Wagen Type 60, ashtu si vetura në të cilën ishte bazuar.

Motori i përdorur në V2 Sagitta ishte pothuajse identik me atë të përdorur në veturën e “donatorëve” Kdf Type 60. Kjo nënkuptonte një motor 1.1 litërsh (1,131 cc) me ftohje me ajër, që zhvillon 24,5 kuaj fuqi në 3,300 rrotullime për minutë. Me një motor të dobët V2 mund të tërhiqte deri në 138kMh, sepse aerodinamika e rafinuar kompensonte mungesën e fuqisë.

Trupi elegant prej alumini i Volkhart V2 u projektua nga inxhinieri aerodinamist Baron R. König von Fachsenfeld, i cili më vonë do të vazhdonte të punonte në shumë vetura moderne për Opel, Adler dhe BMW. Ai gjithashtu ndërtoi një veturë testimi aerodinamike për prodhuesin e gomave Fulda, bazuar në Maybach SW38, për teste në 200kMh.

Më i shpejtë se një “plumb” dhe më aerodinamik se Golf 7 dhe Mercedes CLA

Në vitin 1938, Porsche prodhoi Type 64. Në thelb, ishte prototipi testues i Porsche dhe konsiderohet vetura e parë që mban emrin Porsche dhe në të njëjtën kohë paraardhësi i modelit të parë serial 356. Me të, Ferdinand Porsche dëshmoi se ishte mjeshtër i aerodinamikës. Type 64 (Typ 64) kishte një koeficient të tërheqjes prej vetëm 0.20 Cd – një arritje e jashtëzakonshme për atë kohë. Megjithatë, “Shigjeta” e Baron von Fachsenfeld, si inxhinier i specializuar në aerodinamikë, e pranoi sfidën ndaj Porsche.

Megjithëse motori i Type 64 prodhonte 32 kuaj fuqi në 4000 rrotullime për minutë dhe arrinte shpejtësinë maksimale prej 142kMh, mund të thuhet se Volkhart ishte më aerodinamik dhe relativisht më i shpejtë se Porsche, pavarësisht fuqisë më të ulët. Për më tepër, Type 64 ishte mbi 250 kilogramë më i lehtë se krijimi i Volkhart. Porsche peshonte vetëm 615 kilogramë, ndërsa Volkhart V2 Sagitta peshonte 880 kilogramë.

U prodhuan vetëm dy ekzemplarë

Projekti i një veture të shpejtë korrier për Forcat Ajrore Gjermane nuk u realizua kurrë zyrtarisht. Për shkak të luftës, projekti u pezullua. Dhe megjithëse vazhdoi pas luftës, Volkhart V2 Sagitta u prodhua përfundimisht në vetëm dy ekzemplarë. Sidoqoftë, vetura arriti të provojë se ishte e mundur të bëhej një veturë revolucionare edhe në kohë konfliktesh të mëdha botërore. Fatkeqësisht, ajo kurrë nuk arriti në prodhimin serik, pjesërisht për shkak të refuzimit të Volkswagen për të furnizuar shasinë, dhe ndoshta kjo ishte inskenuar qëllimisht, pasi dizajni i Baron Reinhard errësoi krenarinë e Porsche.

Sot, vlera e këtij modeli shkon në miliona euro. Në ekspozitën e fundit të shitjeve, Voklhart V2 u ofrua me një çmim fillestar prej 1.8 deri në 2.6 milionë euro, por u tërhoq para ankandit zyrtar. /Telegrafi/