Përplas me fadromë pushuesin në Pogradec, arrestohen drejtuesi i mjetit dhe pronari i firmës

Policia e Pogradecit ka arrestuar drejtuesin e mjetit të pastrimit, i cili goditi me fadromën e punës të mërkurën, një pushues në breg të liqenit.

Në pranga ka përfunduar dhe përgjegjësi i firmës së pastrimit, për shkelje të rregullave të mbrojtjes në punë.

Materialet proceduriale në ngarkim të tyre i kaluan Prokurorisë pranë Gjykatës së Shkallës së Parë të Juridiksionit të Përgjithshëm Korçë, për veprime të mëtejshme.

“Specialistët për Hetimin e Krimeve të Komisariatit të Policisë Pogradec arrestuan në flagrancë shtetasin D. P., 31 vjeç (punonjës i një firme pastrimi), banues në Pogradec, pasi në lagjen nr. 1, Pogradec, në plazhin e liqenit, me një mjet teknologjik (fadromë), me të cilin ky shtetas po pastronte mbetjet në bregun e liqenit, ka goditur shtetasin A. K., 53 vjeç (pushues), banues në Tiranë, i cili u dëmtua rëndë dhe për këtë shkak, ndodhet në spital, në kujdesin e mjekëve.

Gjithashtu, nga hetimet për këtë rast, u vu në pranga shtetasi G. D., 40 vjeç, banues në Pogradec, me detyrë përgjegjës i kësaj firme pastrimi, për veprën penale “Shkelja e rregullave të mbrojtjes në punë”, pasi dyshohet se nuk ka kontrolluar punonjësit e firmës dhe nuk i ka sqaruar ata, në lidhje me detyrat”, njofton policia.

Kujtojmë se teksa po pastronte në bregun e liqenit, fadroma goditi në kokë dhe shpatull plazhistin që po pushonte në breg të liqenit.

Ai u transportua me urgjencë drejt spitalit të Traumës për marrjen e një trajtimi më të specializuar. /Telegrafi/