Stefan: Shoqëri laike nuk do të thotë shoqëri pa Zot, kisha nuk mund të përjashtohet nga shoqëria

Besimtarët së bashku me krerët e Kishës Ortodokse Maqedonase-Kryepeshkopata e Ohrit sot protestuan kundër miratimit të Ligjit për Evidencën Amë dhe Ligjit për Barazi Gjinore, në oborrin e kishës katedrale “Shën Klimenti i Ohrit” në Shkup.

“Jemi mbledhur për t’i thënë po jetës, për të shpallur shenjtërinë e familjes së krijuar nga një burrë dhe një grua, për të thënë se do t’i mbrojmë fëmijët nga ideologjitë e reja të papranueshme dhe fyese. Kisha nuk proteston kundër asnjë personi dhe nuk refuzon askënd. Shoqëri laike nuk do të thotë shoqëri pa Zot. Nuk kemi asgjë kundër mentalitetit laik, por pyesim veten nëse kjo do të thotë të përjashtojmë kishën nga jeta shoqërore.

Jemi të vetëdijshëm për planet, synimet dhe dëshirat e organizatave dhe lëvizjeve që e kanë forcuar shoqërinë tonë në atë masë saqë disa prej tyre kanë depërtuar në institucionet shtetërore dhe madje kanë shkruar ligje për ne. Ligje si ato dy ligjet jo shumë të lumtura për barazinë gjinore dhe regjistrimin e lindjeve, të cilat dhunshëm dhe duke sfiduar vullnetin tonë synojnë të laicizojnë kishën dhe ta detyrojnë atë të flasë gjuhën e një rendi botëror që është i huaj për fjalën dhe frymën e apostujve, sytë e shenjtorëve dhe ungjillin e shenjtë”, tha Stefan./Telegrafi/